Andijon shahrining Marhamat tumanida o‘zlarini Prezident administratsiyasi huzuridagi Axborot va ommaviy kommunikatsiyalar agentligining vakillari deb tanishtirgan shaxslar bog‘cha mudirasidan 200 ming so‘m pora olayotganda qo‘lga olindi, deb xabar bermoqda agentlik matbuot xizmati.
Ma’lum bo‘lishicha, Andijon shahridagi maktabgacha ta’lim bo‘limiga qarashli 6, 33, 47, va 61-sonli maktabgacha ta’lim tashkilotlarida o‘zlarini “Prezident administratsiyasi huzuridagi Axborot va ommaviy kommunikatsiyalar agentligi xodimlari” deb tanishtirgan fuqarolar — A.A. va M.A. muayyan muammolarni aniqlab, muassasalar rahbarlaridan pul talab qilgan.
Xususan, ular Andijon shahridagi 3 ta maktabgacha ta’lim tashkilotini tekshirib, ularning faoliyatida turli kamchiliklarni aniqlab, tashkilot rahbarlaridan jami 1 million so‘mni noqonuniy tarzda talab qilib olgan. Ularning xatti-harakatlaridan norozi bo‘lgan Andijon shahridagi maktabgacha ta’lim bo‘limiga qarashli muassasalardan birining rahbari mazkur holat yuzasidan viloyat ichki ishlar boshqarmasiga murojaat qilgan.
Olib borilgan tezkor harakatlar natijasida 19-yanvar kuni A.A. va M.A. Andijon viloyatining Marhamat tumanida joylashgan 28-sonli MTT faoliyati bo‘yicha material tayyorlash maqsadida muassasa rahbaridan 200 ming so‘m miqdorida pul mablag‘i olayotgan vaqtida tuman ichki ishlar bo‘limi mas’ul xodimlari tomonidan qo‘lga olindi. Ularga tegishli qalbaki guvohnomalar ashyoviy dalil sifatida olib qo‘yilgan.
Tekshirish davomida ushbu shaxslar “Xalq irodasi” jurnali tahririyati tomonidan berilgan guvohnomalarda Prezident administratsiyasi huzuridagi AOKA nomi yozilgan hamda davlat ramzi (gerbi) qo‘yilgan guvohnomalardan foydalanib, bog‘chalar faoliyatini tekshirib yurganligi aniqlangan. Ular “Xalq irodasi” jurnali tahririyatida jamoatchilik shartnomasi asosida ishlab kelgan.
Hozirda mazkur holat yuzasidan Andijon viloyati Marhamat tumani IIB tomonidan tergovga qadar surishtiruv ishlar olib borilmoqda.
Eslatib o‘tamiz, 2020-yilning iyun oyida Buxoroda AOKA nomidan noqonuniy foydalanib ish tutgan muxbirlar qo‘lga olingandi.
