Donald Tramp AQSh Kinoaktyorlar gildiyasi Intizom qo‘mitasi uni kasaba uyushmasining tartib-qoidalarini buzgani uchun a’zolikdan chiqarib tashlash masalasini ko‘rib chiqayotganidan xabar topganidan so‘ng a’zolikdan o‘zi ketdi, deb xabar beradi Esquire.
“Bugun sizlarga Intizom qo‘mitasining meni kasaba uyushmasidagi a’zoligimdan mahrum qilishga qaratilgan eshituvi sabab yozmoqdaman. Bu bilan kimning nima ishi bor?!”, — deb yozadi Tramp Gildiya prezidenti, aktrisa Gabriel Karterisga yo‘llagan maktubida. Shuningdek, u endilikda o‘ziga “hech qanday yordam bermagan” tashkilotga “hech qanaqa bog‘liqligi” bo‘lishini xohlamasligini ta’kidlagan.
Bunga Karteris va ijrochi direktor Devid Uayt ikkita so‘z bilan javob qaytargan: “Rahmat sizga”.
19-yanvar kuni Gildiyada Trampni a’zolikdan chiqarish bo‘yicha maxsus komissiya chaqirilgan edi. Shundan so‘ng uning vakillari tashkilotning Intizom qo‘mitasiga murojaat qilgan. Ular Tramp Gildiyaning qadriyatlarini — “demokratiya, haqiqat, irqi va dinidan qat’iy nazar oddiy amerikaliklarga nisbatan hurmat va matbuot erkinligi”ni buzgan deb hisoblamoqda.
“Ayblovlarda Trampning 6-yanvar kuni Kapitoliyga uyushtirilgan hujumga aloqasi va ko‘pchiligi Gildiyaning a’zosi bo‘lgan jurnalistlar xavfsizligiga tahdid tug‘dirishga yo‘naltirilgan yolg‘on axborot tarqatishni qo‘llab-quvvatlagani aniq qayd etilgan”, — deyiladi tashkilot bayonotida.
AQSh Kinoaktyorlar gildiyasi 1933-yilda tashkil etilgan. Tashkilot kino, televideniye va boshqa soha xodimlarining manfaatlarini himoya qiladi. Tramp 1989-yildan buyon uning a’zosi hisoblanadi.
Donald Trampning xatida qayd etilishicha, u “Namunali erkak” komediyasida, “Uoll-strit: Pullar uxlamaydi” trillerida va boshqa ko‘plab televizion shoularda — Saturday Night Live’dan tortib, The Apprentice’ga qadar suratga tushgan.
Izoh (0)