Fransiyada shifokorlar dunyoda birinchi marotaba bemorga ikkita qo‘l va yelkani ko‘chirib o‘tkazish bo‘yicha operatsiyani o‘tkazdi, deb xabar beradi “Korrespondent.net”.
The Guardian nashrining yozishicha, 48 yoshli Islandiya fuqarosi Feliks Gretarsson qo‘llaridan 1998-yilda sodir bo‘lgan baxtsiz hodisa oqibatida ayrilgan. Erkak yuqori voltli elektr uzatish liniyasida ishlayotganida 11 ming voltli kuchlanish uning ikkala qo‘lini ham kuydirib yuborgan.
“Gretarrson ko‘plab jarohatlar olgan va uch oy komada yotgan, jarrohlar uning ikkala qo‘lini ham kesib tashlashga majbur bo‘lgan, shuningdek, u yana bir nechta operatsiyani boshidan o‘tkazgan, jumladan, erkakka buyrak ko‘chirib o‘tkazilgan”, — deyiladi xabarda.
Gretarssonga donorlar bir necha yil davomida qidirilgan bo‘lib, operatsiyaga tayyorgarlik ko‘rish uchun jami 50 nafar tibbiyot xodimi jalb etilgan. Transplantatsiya vaqtida to‘rtta jarrohlar brigadasi ish olib borgan.
Hozirda erkak operatsiyadan so‘ng Liondagi klinikalarning birida sog‘lig‘ini qayta tiklamoqda. Shifokorlar Gretarssonning qo‘llari qanchalik harakatlana olishini prognoz qilishdan bosh tortmoqda. Jarroh Aram Gazaryanning so‘zlariga ko‘ra, bemor tirsagini buka olsa, bu uning hayotini o‘zgartirib yuboradi.
Avvalroq Xitoyda yuragi uch kun davomida urmagan qiz omon qolgani to‘g‘risida xabar berilgandi.
Izoh (0)