Fahriye Evjen eng go‘zal musulmon ayollardan biri deb topildi, “Qora niyat” xiyonatni targ‘ib qilishda ayblandi. Turk kinosi yangiliklari

Turk kinosanoatidagi eng yangi xabarlarni e’tiboringizga havola etishda davom etamiz.

“Qora niyat” seriali RTÜK — senzura qo‘mitasining “qora ro‘yxatidan” o‘rin oldi. Tomoshabinlar serialni er-xotinlarning bir-biriga xiyonatini targ‘ib qilishda ayblamoqda. Xiyonat oilalarning buzilishiga sabab bo‘ladi deb hisoblagani sabab, muxlislar tomonidan bildirilgan e’tirozlar o‘rganib chiqilib, jarima solinadi.

“Elchining qizi” serialini tark etgan Uraz Kaygilarog‘lu uzoq vaqt bo‘sh o‘tirmaslikka qaror qildi va Jem Yilmazning Netflix uchun suratga oladigan yangi loyihasida ishtirok etishni muhokama qilishga kirishdi.

Ayni vaqtda “Mening chap tarafim” serialida suratga tushayotgan Defne Samelining reputatsiyasiga ta’sir qiladigan xabarlar tarqaldi. Hürriyet gazetasining jurnalisti Sinem Vunalning ma’lum qilishicha, Defne so‘nggi ikki yil ichida ijara haqqini to‘lamagani sabab unga qarshi davo ochilgan. Ushbu xabarga nisbatan aktrisa bu uni yerga urish va obro‘sini tushirishga qaratilgan xatti-harakat ekanini ta’kidlagan.

Italiyada bo‘lgan Jan Yaman yangi sevgilisi bilan vaqt o‘tkazish bilan birga hamkorlikdagi loyihalarda ham ishtirok etmoqda. Chi jurnali Janning Diletta Leotto bilan tushgan suratini e’lon qilgan.

Selahattin Pashali va Xazal Kaya Netflix platformasi uchun suratga tushayotgan “Pere Palasdagi yarim tun” serialida birga suratga tushadi.

Hindistonning Bollyinside sayti talqiniga ko‘ra Fahriye Evjen dunyoning eng go‘zal musulmon ayollari ro‘yxatidan o‘rin olgan. Aktrisa uchun millionlab odamlar ovoz bergan.

Tarik Emir Tekin “Sadoqatsiz” serialidagi ishtirokini davom ettiradi. Avvalroq uning loyihani tark etishi haqida ma’lumot tarqalgandi. Eren Vurdem esa serialni tark etadi.

Serkan Chayog‘lu “Kiprdagi qish” serialida suratga tushmoqda. 26 qismdan iborat serial premyerasi mart oyida bo‘lishi kutilmoqda.