Libos yoki aksessuarlar tanlaganda zamon bilan hamnafas bo‘lgan yaxshi, lekin bir narsani yoddan chiqarmaslik kerak: qomat va tana tuzilishi har kimda individual. Boshqa bir kishiga yarashgan va trenddagi libos, sizga umuman to‘g‘ri kelmasligi mumkin.
Keng yoqali libos
Obrazni qiziqarli qilishi mumkin bo‘lgani bilan bunday libosni yelkasi va ko‘krak qafasi keng qizlarga kiyish tavsiya qilinmaydi. Chunki keng yoqalar hisobiga tananing beldan tepa qismi yanada yirik ko‘rinadi. Buning o‘rniga bo‘yin qismi uchburchak libos modellariga e’tibor qaratish tavsiya qilinadi.
Kichkina sumkalar
Aksessuar va detallarni qomat proporsiyasidan kelib chiqqan holda tanlash kerak. Shu sabab ham kichik hajmli sumkalarni xarid qilish tavsiya qilinmaydi. Bunday sumkalar so‘nggi vaqtlarda har qachongidan ham dolzarb ekanligiga qaramay, to‘ladan kelgan ayollarga unchalik to‘g‘ri kelmaydi. Chunki sumka kichikligi hisobiga uni tutgan ayol yoki qiz aslidan ham yirik bo‘lib ko‘rinadi.
Beldan pastda turadigan shim yoki yubka
Bella Xadid, Emili Ratakovski singari mashhurlar garderobida uchratish mumkin bo‘lgan mazkur bichim asosan nozik va xipchabel qizlarga yarashishini unutmang. Boshqalarning esa qomatini xunuk va bo‘yini ham past ko‘rsatadi.
Yelka qismi keng liboslar
Libosning yelka qismi kengligi hisobiga uni kiygan ayol yoki qiz sarvqomat ko‘rinishi mumkin. Lekin hammada ham emas. Qomati to‘rtburchak va uchburchak shaklni esga soladigan nozik jins vakillarini ko‘ngildagidek ko‘rsatmaydi. Yelkalar keng, gavdaning tepa qismi noproporsional ko‘rinadi.
Yengi keng kiyimlar
Yengi keng liboslar ham yelkasi keng kiyimlar singari xususiyatga ega. Agar beldan yuqori qismingiz shundoq ham keng bo‘lsa, bu kabi libos va elementlardan voz keching.
Charm matodan tikilgan shim
Moda ixlosmandlarining eng sevimli kiyimlaridan bir hisoblangan charm shim hammaga ham yarashavermaydi. Charm mato qomatni to‘laroq ko‘rsatgani sabab uni kiygan ayol-qizning oyoqlari va beli aslidan semiz ko‘rinishga ega bo‘ladi. Bundan qochish uchun yaltiramaydigan matodan tikilgan shimlarga e’tibor qaratish tavsiya qilinadi.
Izoh (0)