So‘nggi o‘n yillikning eng yaxshi to‘purar himoyachilari aniqlandi. Ramos peshqadam, o‘zbekistonlik futbolchi top-20 ga kirdi

Xalqaro futbol tarixi va statistikasi federatsiyasi (IFFHS) so‘nggi o‘n yillikning eng sermahsul himoyachilari reytingini e’lon qildi.

Ro‘yxatni “Real” klubi va Ispaniya terma jamoasi himoyachisi Serxio Ramos boshqarib turibdi. 2011—2020-yillar oralig‘ida Ramos klub safida 71 ta va terma jamoa tarkibida 18 ta gol urgan (jami 89 ta). Ikkinchi o‘rinda gibraltarlik himoyachi Jozef Chipolina (78 ta gol) qayd etilgan bo‘lsa, Kosta-Rika vakili Keylor Soto (73) kuchli uchlikka yakun yasagan.

E’tiborlisi, “Qo‘qon-1912” qanot himoyachisi Murod Xolmuhammedov reytingning 19-pog‘onasidan joy oldi. Murod klub tizimida 46 ta va terma jamoa safida bitta gol urgan. Umumiy — 47 ta.

Shuningdek, “Metallurg”, “So‘g‘diyona” va “Dinamo” klublarida faoliyat yuritgan Dilmurod Karimov 35 ta gol bilan reytingning 51-o‘rinida qayd etildi.

To‘liq ro‘yxat bilan ushbu havolada tanishing.