Сўнгги ўн йилликнинг энг яхши тўпурар ҳимоячилари аниқланди. Рамос пешқадам, ўзбекистонлик футболчи топ-20 га кирди

Халқаро футбол тарихи ва статистикаси федерацияси (IFFHS) сўнгги ўн йилликнинг энг сермаҳсул ҳимоячилари рейтингини эълон қилди.

Рўйхатни «Реал» клуби ва Испания терма жамоаси ҳимоячиси Серхио Рамос бошқариб турибди. 2011—2020 йиллар оралиғида Рамос клуб сафида 71 та ва терма жамоа таркибида 18 та гол урган (жами 89 та). Иккинчи ўринда гибралтарлик ҳимоячи Жозеф Чиполина (78 та гол) қайд этилган бўлса, Коста-Рика вакили Кейлор Сото (73) кучли учликка якун ясаган.

Эътиборлиси, «Қўқон-1912» қанот ҳимоячиси Мурод Холмуҳаммедов рейтингнинг 19-поғонасидан жой олди. Мурод клуб тизимида 46 та ва терма жамоа сафида битта гол урган. Умумий — 47 та.

Шунингдек, «Металлург», «Сўғдиёна» ва «Динамо» клубларида фаолият юритган Дилмурод Каримов 35 та гол билан рейтингнинг 51-ўринида қайд этилди.

Тўлиқ рўйхат билан ушбу ҳаволада танишинг.