Portugaliyada mahalliy vaqt bilan 24-yanvar 8:00 da (Toshkent vaqti bilan 13:00) prezident saylovlarida ovoz berish boshlandi, deb xabar bermoqda “Kommersant”. Saylov uchastkalari mahalliy vaqt bilan 19:00 gacha ishlaydi. Portugaliyada 9 milliondan ziyod odam ovoz berish huquqiga ega.
Prezident lavozimiga yetti kishi da’vogarlik qilmoqda. Ayni paytda oliy davlat lavozimini 72 yoshli Marselu Rebelu di Souza egallab turibdi, u ham ikkinchi muddatga o‘z nomzodini qo‘ygan. Shu paytgacha barcha Portugaliya prezidentlari qayta saylanishga muvaffaq bo‘lgan.
Portugaliyada boshqaruv muddati besh yilga teng. G‘olib chiqish uchun nomzod ovozlarning 50 foizdan ortig‘ini qo‘lga kiritishi kerak. Agar bunday bo‘lmasa, 14-fevral kuni Portugaliyada saylovlarning ikkinchi bosqichi o‘tkaziladi.
Portugaliyada ovoz berish mamlakatda koronavirus infeksiyasi tarqalish sur’atlari o‘sayotgan bir paytda bo‘lib o‘tmoqda. Aholisi 10 milliondan ko‘p bo‘lgan respublikada jami 625 mingga yaqin odam koronavirusga chalingan, 10,1 mingdan ziyod bemor vafot etgan.
Saylov arafasida mamlakatda kasallanish holatlari, shuningdek, virusdan o‘lim bo‘yicha sutkalik antirekord qayd etilgandi. Shu munosabat bilan Portugaliya saylovlarning xavfsiz o‘tkazilishini kafolatlashga harakat qildi.
Izoh (0)