Ijtimoiy tarmoqlarda Namangan viloyati Chortoq tumanining 39-maktabi Buloqboshi filialining achinarli tarzdagi holati aks etgan videolavha tarqalgan edi. Hashar yo‘li bilan qurilgan ushbu filial o‘rniga 330 o‘rinli yangi maktab binosi quriladi. Bu haqda xalq ta’limi vaziri o‘rinbosari Ibrohim Jo‘rayev AOKAdagi matbuot anjumanida ma’lum qildi.
“Namangan viloyati Chortoq tumani Bog‘iston qishlog‘idagi 39-maktabga shaxsan xalq ta’limi vaziri bilan birga borib, holatni o‘rganganmiz. Haqiqatan ikki xonadan iborat maktab. Biz hisob-kitob qilib, maktab filialini o‘rniga zamonaviy-namunaviy loyihada ishlab chiqilgan 330 o‘rinli maktab va unga qo‘shimcha 12x24 o‘lchamli sport zali qurishni rejalashtirganmiz”, – dedi Ibrohim Jo‘rayev.
Ta’kidlanishicha, Prezident qarori bilan bu maktab investitsiya dasturiga kiritilgan. Hozirda maktab loyihasi ishlab chiqilgan. Tuman hokimligi tomonidan maktab uchun yer ajratish bo‘yicha qaror ham chiqib, 2 gektar yer ajratilgan.
Umuman olganda, maktablarga qo‘shimcha bino yoki yangi sport zallarini qurishda maktablarni “o‘ta og‘ir”, “og‘ir”, “o‘rta” va “yaxshi” kabi 8 ballik tizim orqali maktablarning holati o‘rganiladi hamda shunga asoslanib investitsiya kiritiladi.
“Oxirgi 3 yilga qaraydigan bo‘lsak, maktablarni qurish yoki qo‘shimcha bino qurish, ularni kapital ta’mirdan chiqarish templari sezilarli darajada o‘sgan. O‘tgan 2018-yildan 2020-yilgacha respublika bo‘yicha 294 ming qo‘shimcha yangi o‘rinlari yaratilgan. Haqiqatan ham ijtimoiy tarmoqlarda tarqalayotgan, o‘zimiz borib ko‘rganda maktablarda xonalarning yetishmasligi kabi holatlar aniqlangan. Umuman, maktablar qurilayotganda hududdagi bolalar soniga va o‘quvchilarning o‘qishini maktabdan maktabga ko‘chirishi e’tiborga olinadi”, – dedi Jo‘rayev.
Ma’lum qilinishicha, endigi maktab filiallari o‘rniga shu mahalla va atrofda yashaydigan 5—11-sinf o‘quvchilari uzoqqa qatnab o‘qimasligi uchun kamida 200 o‘rinli quvvatga ega maktablarni qurish rejalashtirilgan. Bu bilan zamonaviy maktab bo‘lganidan so‘ng malakali o‘qituvchilarni jalb qilish imkoniyati ham mavjud bo‘ladi.
Izoh (0)