Ижтимоий тармоқларда Наманган вилояти Чортоқ туманининг 39-мактаби Булоқбоши филиалининг ачинарли тарздаги ҳолати акс этган видеолавҳа тарқалган эди. Ҳашар йўли билан қурилган ушбу филиал ўрнига 330 ўринли янги мактаб биноси қурилади. Бу ҳақда халқ таълими вазири ўринбосари Иброҳим Жўраев АОКАдаги матбуот анжуманида маълум қилди.
«Наманган вилояти Чортоқ тумани Боғистон қишлоғидаги 39-мактабга шахсан халқ таълими вазири билан бирга бориб, ҳолатни ўрганганмиз. Ҳақиқатан икки хонадан иборат мактаб. Биз ҳисоб-китоб қилиб, мактаб филиалини ўрнига замонавий-намунавий лойиҳада ишлаб чиқилган 330 ўринли мактаб ва унга қўшимча 12х24 ўлчамли спорт зали қуришни режалаштирганмиз», – деди Иброҳим Жўраев.
Таъкидланишича, Президент қарори билан бу мактаб инвестиция дастурига киритилган. Ҳозирда мактаб лойиҳаси ишлаб чиқилган. Туман ҳокимлиги томонидан мактаб учун ер ажратиш бўйича қарор ҳам чиқиб, 2 гектар ер ажратилган.
Умуман олганда, мактабларга қўшимча бино ёки янги спорт залларини қуришда мактабларни «ўта оғир», «оғир», «ўрта» ва «яхши» каби 8 баллик тизим орқали мактабларнинг ҳолати ўрганилади ҳамда шунга асосланиб инвестиция киритилади.
«Охирги 3 йилга қарайдиган бўлсак, мактабларни қуриш ёки қўшимча бино қуриш, уларни капитал таъмирдан чиқариш темплари сезиларли даражада ўсган. Ўтган 2018 йилдан 2020 йилгача республика бўйича 294 минг қўшимча янги ўринлари яратилган. Ҳақиқатан ҳам ижтимоий тармоқларда тарқалаётган, ўзимиз бориб кўрганда мактабларда хоналарнинг етишмаслиги каби ҳолатлар аниқланган. Умуман, мактаблар қурилаётганда ҳудуддаги болалар сонига ва ўқувчиларнинг ўқишини мактабдан мактабга кўчириши эътиборга олинади», – деди Жўраев.
Маълум қилинишича, эндиги мактаб филиаллари ўрнига шу маҳалла ва атрофда яшайдиган 5—11-синф ўқувчилари узоққа қатнаб ўқимаслиги учун камида 200 ўринли қувватга эга мактабларни қуриш режалаштирилган. Бу билан замонавий мактаб бўлганидан сўнг малакали ўқитувчиларни жалб қилиш имконияти ҳам мавжуд бўлади.
Изоҳ (0)