Samarqand shahrida AQShning yangi prezidenti Jo Bayden nomi bilan tadbirkorlik subyekti ro‘yxatdan o‘tkazildi.
Samarqand shahrining Turkiston ko‘chasi 62-uyda joylashgan Joe Biden nomli MChJ 2021-yil 21-yanvar kuni Samarqand shahri Davlat xizmatlari markazi tomonidan ro‘yxatga olingan.
Eslatib o‘tamiz, 2016-yilda Donald Tramp AQSh prezidenti etib saylanganida ham O‘zbekistonda bir qator firmalar ushbu nom ostida ro‘yxatdan o‘tkazilgan edi. Xususan, 2016-yilning 23-noyabrida Toshkentda iqtisodiy faoliyat turi “Ishlab chiqarish maqsadlariga mo‘ljallangan yoki mo‘ljallanmagan yashashga yaroqsiz ko‘chmas mulkni boshqarish” bo‘lgan Trump Impex MChJ ro‘yxatdan o‘tkazilgan. Shuningdek, o‘sha yilning oktabrida xorijiy sarmoya ishtirokidagi Trump Cotton MChJ ham ro‘yxatga olingandi.
Avvalroq Kattaqo‘rg‘on tumani Payshanba shaharchasida “Shavkat Miromonovich Mirziyoyev” nomli oilaviy korxona borligi, korxonaga bu nom qo‘yilishini A’zamxon Bahromov ham qo‘llab-quvvatlagani to‘g‘risida xabar berilgandi.
Ma’lumot uchun, 2019-yil avgustida esa Toshkentda “Lyubaya biznes xorosha” nomli mas’uliyati cheklangan jamiyat tashkil etilgan edi. KTYaDR ma’lumotlariga ko‘ra, korxona maishiy elektr tovarlar ulgurji savdosi bilan shug‘ullanadi.
2020-yil iyunida Surxondaryoda “Voy Mani Okahonlarim” nomli, yirik shoxli qoramollarning sut beradigan zotlarini ko‘paytirish bilan shug‘ullanuvchi oilaviy korxona ro‘yxatdan o‘tkazilgan edi. Keyinchalik korxona nomi “Akbar Ali Adolat” deb o‘zgartirilgan. 2020-yil mayida Jizzax viloyatida “Vapshe malades bala” nomli, keng assortimentdagi tovarlar ulgurji savdosi bo‘yicha agentlar faoliyati bilan shug‘ullanuvchi kompaniya ro‘yxatdan o‘tkazilgani ma’lum bo‘lgan edi.
Izoh (0)