Самарқанд шаҳрида АҚШнинг янги президенти Жо Байден номи билан тадбиркорлик субъекти рўйхатдан ўтказилди.
Самарқанд шаҳрининг Туркистон кўчаси 62-уйда жойлашган Joe Biden номли МЧЖ 2021 йил 21 январь куни Самарқанд шаҳри Давлат хизматлари маркази томонидан рўйхатга олинган.
Эслатиб ўтамиз, 2016 йилда Дональд Трамп АҚШ президенти этиб сайланганида ҳам Ўзбекистонда бир қатор фирмалар ушбу ном остида рўйхатдан ўтказилган эди. Хусусан, 2016 йилнинг 23 ноябрида Тошкентда иқтисодий фаолият тури «Ишлаб чиқариш мақсадларига мўлжалланган ёки мўлжалланмаган яшашга яроқсиз кўчмас мулкни бошқариш» бўлган Trump Impex МЧЖ рўйхатдан ўтказилган. Шунингдек, ўша йилнинг октябрида хорижий сармоя иштирокидаги Trump Cotton МЧЖ ҳам рўйхатга олинганди.
Аввалроқ Каттақўрғон тумани Пайшанба шаҳарчасида «Шавкат Миромонович Мирзиёев» номли оилавий корхона борлиги, корхонага бу ном қўйилишини Аъзамхон Баҳромов ҳам қўллаб-қувватлагани тўғрисида хабар берилганди.
Маълумот учун, 2019 йил августида эса Тошкентда «Любая бизнес хороша» номли масъулияти чекланган жамият ташкил этилган эди. КТЯДР маълумотларига кўра, корхона маиший электр товарлар улгуржи савдоси билан шуғулланади.
2020 йил июнида Сурхондарёда «Вой Мани Окаҳонларим» номли, йирик шохли қорамолларнинг сут берадиган зотларини кўпайтириш билан шуғулланувчи оилавий корхона рўйхатдан ўтказилган эди. Кейинчалик корхона номи «Акбар Али Адолат» деб ўзгартирилган. 2020 йил майида Жиззах вилоятида «Вапше маладес бала» номли, кенг ассортиментдаги товарлар улгуржи савдоси бўйича агентлар фаолияти билан шуғулланувчи компания рўйхатдан ўтказилгани маълум бўлган эди.
Изоҳ (0)