Buxoro viloyatida saksovul o‘simligini terish evaziga fuqarodan 150 dollar talab qilgan Peshku, Jondor hamda Buxoro tumani ekologiya va atrof-muhitni muhofaza qilish inspeksiyalari mas’ullarining tamagirliklari fosh etildi, deya xabar berdi “Daryo” muxbiri.
Ta’kidlanishicha, Buxoro viloyat IIB boshlig‘i nomiga Buxoro tumanidagi “Qumrabot” mahallasida yashovchi fuqaro J.I. ariza bilan murojaat qilib, unga o‘zini Buxoro tuman ekologiya va atrof-muhitni himoya qilish boshlig‘i B.K. deb tanishtirgan shaxs tuman hududidagi cho‘l massividan saksovul o‘simligini terishga sharoit yaratib berish va jarimaga tortmasligi evaziga 150 dollar talab qilib kelganini bildirgan.
Arizaga asosan, viloyat IIB jinoyat qidiruv boshqarmasi jinoyat-qidiruv boshqarmasi, korrupsiya va iqtisodiy jinoyatlarga qarshi kurashish bo‘limi xodimlari hamda departamentning Romitan tuman bo‘limlari bilan hamkorlikda Buxoro shahrida tezkor tadbir o‘tkazilgan.
Ma’lum bo‘lishicha, inspeksiyaning Buxoro tumani bo‘limi boshlig‘i B.K. fuqaro J.I.ga saksovul o‘simligini terishga sharoit yaratib berilishi evaziga talab qilayotgan pulni ekologiya va atrof-muhitni muhofaza qilish sohasidagi nazorati bo‘yicha Jondor tuman inspeksiyasi bosh mutaxassisi A.I. orqali yetkazishni so‘ragan. Tezkor tadbir jarayonida A.I. fuqaro J.I.dan 100 dollar hamda 500 ming so‘m pullarni olayotgan vaqtida daliliy ashyolar bilan qo‘lga olingan.
Huquq-tartibot idoralari tomonidan olib borilgan surishtiruv ishlari davomida pora bilan qo‘lga olingan A.I. tamagirlik bilan bog‘liq holat bir-biriga zanjir holda yuzaga kelganini bildirgan. Ushbu jinoiy sheriklikka Peshku tumani inspeksiyasi bosh mutaxassisi Sh.T. ham aralashganiga aniqlik kiritilgan va fuqaro J.I. bir vaqtning o‘zida bir nechta tamagirlar tuzog‘iga tushib qolgani fosh etilgan.
Mazkur holat yuzasidan to‘plangan hujjatlar qonuniy qaror qabul qilish uchun departamentning Buxoro viloyati bo‘limiga topshirilgan.
Izoh (0)