Бухоро вилоятида саксовул ўсимлигини териш эвазига фуқародан 150 доллар талаб қилган Пешку, Жондор ҳамда Бухоро тумани экология ва атроф-муҳитни муҳофаза қилиш инспекциялари масъулларининг тамагирликлари фош этилди, дея хабар берди «Дарё» мухбири.
Таъкидланишича, Бухоро вилоят ИИБ бошлиғи номига Бухоро туманидаги «Қумработ» маҳалласида яшовчи фуқаро Ж.И. ариза билан мурожаат қилиб, унга ўзини Бухоро туман экология ва атроф-муҳитни ҳимоя қилиш бошлиғи Б.К. деб таништирган шахс туман ҳудудидаги чўл массивидан саксовул ўсимлигини теришга шароит яратиб бериш ва жаримага тортмаслиги эвазига 150 доллар талаб қилиб келганини билдирган.
Аризага асосан, вилоят ИИБ жиноят қидирув бошқармаси жиноят-қидирув бошқармаси, коррупция ва иқтисодий жиноятларга қарши курашиш бўлими ходимлари ҳамда департаментнинг Ромитан туман бўлимлари билан ҳамкорликда Бухоро шаҳрида тезкор тадбир ўтказилган.
Маълум бўлишича, инспекциянинг Бухоро тумани бўлими бошлиғи Б.К. фуқаро Ж.И.га саксовул ўсимлигини теришга шароит яратиб берилиши эвазига талаб қилаётган пулни экология ва атроф-муҳитни муҳофаза қилиш соҳасидаги назорати бўйича Жондор туман инспекцияси бош мутахассиси А.И. орқали етказишни сўраган. Тезкор тадбир жараёнида А.И. фуқаро Ж.И.дан 100 доллар ҳамда 500 минг сўм пулларни олаётган вақтида далилий ашёлар билан қўлга олинган.
Ҳуқуқ-тартибот идоралари томонидан олиб борилган суриштирув ишлари давомида пора билан қўлга олинган А.И. тамагирлик билан боғлиқ ҳолат бир-бирига занжир ҳолда юзага келганини билдирган. Ушбу жиноий шерикликка Пешку тумани инспекцияси бош мутахассиси Ш.Т. ҳам аралашганига аниқлик киритилган ва фуқаро Ж.И. бир вақтнинг ўзида бир нечта тамагирлар тузоғига тушиб қолгани фош этилган.
Мазкур ҳолат юзасидан тўпланган ҳужжатлар қонуний қарор қабул қилиш учун департаментнинг Бухоро вилояти бўлимига топширилган.
Изоҳ (0)