O‘zbekiston Tashqi ishlar vazirligi Qirg‘izistonga boruvchi fuqarolarni ogohlantirdi.
O‘zbekistonning Bishkek shahridagi elchixonasi ma’lumotiga ko‘ra, 2021-yil 13-yanvarda qabul qilingan “Qirg‘iziston Respublikasiga kirib kelayotgan xorijiy davlatlar fuqarolari va fuqaroligi bo‘lmagan shaxslarga nisbatan COVID-19 koronavirus infeksiyasi kirib kelishi va tarqalishining oldini olishga qaratilgan harakatlar tartibi” talablariga o‘zgartirishlar kiritildi.
Ushbu tartibga ko‘ra, Qirg‘iziston va chet davlatlar fuqarolari, shuningdek, fuqaroligi bo‘lmagan shaxslar koronavirus infeksiyasi yo‘qligini tasdiqlovchi so‘nggi 72 soat mobaynida (tahlil natijasi olingan vaqtdan boshlab) o‘tkazilgan PZR-test javobini taqdim etgan holdagina mamlakatga uchayotgan samolyot bortiga chiqishiga ruxsat beriladi.
Qirg‘izistonga kirib kelgandan so‘ng Sanitar-karantin shoxobchalari xodimlari tomonidan yo‘lovchilar chegarani kesib o‘tayotganda PZR-test natijasi mavjudligi tekshiriladi va ularning tana harorati o‘lchanadi.
Samolyot bortida yo‘lovchilarga “Qirg‘iziston Respublikasiga kirib keluvchi so‘rovnomasi” berilib, u to‘ldirilgandan so‘ng Sanitar-karantin shoxobchalari xodimlariga taqdim etilishi lozim.
Uzrli sabablar, shu jumladan, parvoz muddati yoki aviareysning kechiktirilishi tufayli PZR-testning amal qilish muddati (72 soat) o‘tgan taqdirda, chet el fuqarolari va fuqaroligi bo‘lmagan shaxslar kelish joyida (aeroportlarda) PZR-test topshirishi lozim.
Mazkur talablar Qirg‘izistonga avtotransport bilan kirib keladigan fuqarolar uchun ham amal qiladi. “Qirg‘iziston Respublikasiga kirib keluvchi so‘rovnomasi” mamlakat Davlat chegarasi nazorat-o‘tish nuqtalaridan to‘ldiriladi.
Shu bilan birga, ko‘rsatilgan talablar quyidagi toifalar uchun tatbiq etilmaydi:
- Qirg‘izistondagi diplomatik vakolatxonalar va konsullik muassasalari xodimlari, xalqaro tashkilotlarning vakillari (ularning kelishi haqida Qirg‘iziston Tashqi ishlar vazirligi orqali oldindan xabar berilgan bo‘lishi lozim);
- rasmiy delegatsiyalar a’zolari (ularning kelishi haqida Qirg‘iziston Tashqi ishlar vazirligi orqali oldindan xabar berilgan bo‘lishi lozim);
- xalqaro yuk tashuvchi, xalqaro muntazam yo‘lovchilarni, shu jumladan, maktabgacha yoshdagi (7 yoshga qadar) bolalarni tashuvchi haydovchilar;
- mamlakatdagi saylov jarayonlarini kuzatish uchun taklif qilingan xalqaro kuzatuvchilar.
Avvalroq O‘zbekiston Tashqi ishlar vazirligi fuqarolarni soxta PZR-test ma’lumotnomalaridan ogohlantirgani hamda Tojikiston va O‘zbekiston o‘rtasida muntazam aviaqatnovlar tiklangani haqida xabar berilgandi.
Izoh (0)