Pandemiya paytida chegaralar yopiqligi tufayli Shimoliy Koreyadan Janubiy Koreyaga qochib o‘tganlar soni keskin kamaydi. 2019-yilda ikki davlat chegarasini 1047 nafar qochqin kesib o‘tgan bo‘lsa, 2020-yilga kelib ularning soni 229 nafarni tashkil qilgan. Bu haqda Janubiy Koreyaning Yonhap agentligi Koreyani Birlashtirish vazirligiga asoslanib xabar berdi.
Odatda Shimoliy Koreya qochqinlari Tailand, Vyetnam yoki Xitoy kabi Janubi-sharqiy Osiyoning boshqa mamlakatlariga sayohat qilgandan so‘ng Janubiy Koreyaga borib joylashadi.
Ammo COVID-19 kasalligi tarqalishi sabab Shimoliy Koreyaning chegaralari 2020-yilning yanvar oyidan beri yopilgan. Qochib ketganlar uchun vaziyatni murakkablashtiradigan narsa shundaki, ularning ko‘pchiligi virusning o‘chog‘i bo‘lgan Xitoy orqali Janubiy Koreyaga qochib o‘tishar edi.
Shimoliy Koreya COVID-19 bilan kasallanganlar soni bo‘yicha statistik ma’lumotlarni oshkor qilmaydi. 2020-yil iyul oyida mamlakat COVID-19 kasalligida gumon qilingan birgina holat haqida xabar berilgan.
Shuningdek, Shimoliy Koreyaning Markaziy telegraf agentligi yuqtirish ehtimoli bo‘lgan odam chegarani noqonuniy kesib o‘tganligi haqida xabar bergan. U bilan muloqotda bo‘lgan barcha odamlar karantinga yuborilgan.
Shu bilan birga, Janubiy Koreyaning JoongAng Ilbo nashrining yozishicha, KXDRda birinchi koronavirus bilan bog‘liq holat fevral oyida aniqlangan. Manbaning ta’kidlashicha, koronavirus Xitoydan kelgan Pxenyanda yashovchi shaxsda aniqlangan.
2020-yil yozida Shimoliy Koreyaning yetakchisi, KXDR Mehnat partiyasining raisi Kim Chen In “partiyaning Markaziy qo‘mitasi rahbarligining uzoqni ko‘ra bilishi va butun xalqning ongli ravishda birdamligi” tufayli mamlakatda bironta kasal odam yo‘qligini aytgan.
Izoh (0)