Rossiyaning Lipesk viloyatida 19-yanvar kuni yangi qurilgan uy kanalizatsiyasi qudug‘idan polietilen paketga o‘ralgan 33 yoshli o‘zbekistonlik erkakning jasadi topildi, deya xabar qilmoqda viloyat Tergov qo‘mitasi.
Ma’lum qilinishicha, 19-yanvar kuni Dobrinskiy tumani Studenka qishlog‘ida yangi qurilgan uy egalari kanalizatsiya qudug‘idan polietilen paketga o‘ralgan 33 yoshli erkakning jasadini topib, bu haqda huquqni muhofaza qilish idoralariga xabar bergan.
Voqea joyiga tezkor tergov guruhi yetib kelgan. Jasad tekshirilganda bo‘yin va bosh qismida jarohatlar borligi aniqlangan.
Ayni paytda sodir etilgan jinoyatning barcha holatlari o‘rganilmoqda, shuningdek, qotilni aniqlash maqsadida tergov harakati va sud ekspertiza olib borilmoqda. Ma’lum qilinishicha, uy egalari so‘roq qilinmoqda va qurilish ishlarida qatnashgan marhumning tanishlari surishtirilib aniqlanmoqda.
Avvalroq Turkiyada o‘zbekistonlik ayollarni fohishalik qilishga majburlagan jinoiy guruh qo‘lga olingani, Rossiyada 36 yoshli o‘zbekistonlik 2 oy ichida yo‘l harakati qoidalarini 131 marta buzgani hamda Turkiyada hibsga olingan Abdukarim Mirzayev ozodlikka chiqarilgani haqida xabar berilgandi.
Izoh (0)