Xitoy poytaxti rasmiylari Pekinda yettita yangi kasallanish holati aniqlanganidan so‘ng koronavirus tarqalishining oldini olish choralarini ko‘rib chiqmoqda. Bu haqda mahalliy nashlarga tayanib “Interfaks” xabar bermoqda.
Xususan, 2020-yilning 10-dekabridan boshlab shaharga kirib kelganlarning barchasida infeksiya bor-yo‘qligini tekshirishga qaror qilingan, chunki virusni aynan tashqaridan olib kirish yangi kasallanish holatlari oshishiga olib kelgan bo‘lishi mumkin.
Poytaxt ma’muriyati qaroriga ko‘ra, so‘nggi sutkada 6 ta yangi kasallanish holati aniqlangan Dasin tumani yaqinida joylashgan “Tyangun yuan” metro bekati yopildi.
So‘nggi sutkada 46 ta yangi “ichki” kasallanish holati qayd etilgan Shimoli-sharqiy Xitoydagi Szilin provinsiyasidagi vaziyat yomonlashishda davom etmoqda. Bir kun avval 43 ta, 17-yanvar kuni esa 30 ta holat aniqlangan. Shu bilan birga, yaqinda infeksiya tarqalishining yangi episentri bo‘lgan Xebey provinsiyasida 19-yanvar kuni mamlakatning o‘zida kasallangan 19 kishi aniqlangan. Bu so‘nggi kunlarga qaraganda ancha kam.
Xitoy Sog‘liqni saqlash davlat qo‘mitasining 20-yanvar kuni e’lon qilgan ma’lumotlariga ko‘ra, o‘tgan sutka davomida mamlakatda 103 kishi COVID-19’ga chalingani aniqlangan. Ulardan 15 nafari chet eldan virus yuqtirgan, qolgan 88 tasi mamlakatning o‘zida kasallangan.
Mamlakatning o‘zida kasallanish holatlari bo‘yicha Pekin, Sizin va Xebey provinsiyalaridan tashqari Rossiya bilan chegaradosh Xeylunszyan provinsiyasida ham 16 ta yangi kasallanish holati qayd etilgan.
Infeksiya tarqalishining qayta avj olishi 12-fevralga to‘g‘ri kelayotgan “Bahor bayrami” — Oy kalendari bo‘yicha Yangi yil arafasida yuz berayotgani Xitoy hukumatini xavotirga solmoqda. Ushbu bayram Xitoyda eng obro‘li bayramlardan biri hisoblanadi. An’anaga ko‘ra, butun mamlakat bo‘ylab “katta” oilaning barcha a’zolari bir joyga yig‘iladi. Bu aholining ommaviy migratsiyasiga, u esa o‘z navbatida odamlarning ommaviy yig‘ilishiga olib keladi. Bu virus tarqalishining kuchayishiga sabab bo‘lishi mumkin.
Avvalroq Xitoyda 8 oy ichida birinchi bor koronavirusga chalingan bemor vafot etgani, mamlakatdagi 5 million aholi yashaydigan shahar bir kishida koronavirus aniqlangani sabab izolyatsiyaga olingani hamda Xitoyning Nangong shahrida besh kun ichida 1,5 ming xonali COVID kasalxonasini qurilgani haqida xabar berilgandi.
Izoh (0)