Buxoro viloyati prokurori Dilshod Fayziyev “boshqa ishga o‘tgani munosabati bilan” lavozimidan ozod qilindi. Uning o‘rniga shu vaqtgacha Markaziy saylov komissiyasi raisi o‘rinbosari lavozimida ishlab kelgan Mahmud Istamov Buxoro viloyati prokurori etib tayinlandi.
Mahmud Istamov 1979-yil 24-fevralda Buxoro shahrida tug‘ilgan. 2000-yilda Toshkent davlat yuridik institutini tamomlagan. Mehnat faoliyatini 2000-yilda Adliya vazirligi Idoraviy me’yoriy hujjatlarni davlat ro‘yxatidan o‘tkazish boshqarmasining katta maslahatchisi lavozimida boshlagan. Keyinchalik mazkur boshqarmada bosh maslahatchi, bo‘lim boshlig‘i, boshqarma boshlig‘i o‘rinbosari lavozimlarida ishlagan.
2004—2005-yillarda Adliya vazirligi huzuridagi Huquqiy axborot bilan ta’minlash markazi rahbari, 2005—2006-yillarda Adliya vazirligi huzuridagi Normativ-huquqiy hujjatlarning amalga oshirilishi ustidan monitoring qilish markazi bo‘limi boshlig‘i lavozimlarida faoliyat olib borgan. 2006-yildan Prezident devoniga ishga o‘tgan.
Jumladan, 2006—2011-yillarda Prezident devoni Huquqni muhofaza qiluvchi va nazorat idoralari faoliyatini muvofiqlashtirish bo‘yicha Davlat maslahatchisi xizmatining Adliya va sud idoralari faoliyati masalalari bo‘yicha inspektori, 2011—2014-yillarda Prezidenti devoni Huquqni muhofaza qiluvchi va nazorat idoralari faoliyatini muvofiqlashtirish xizmatining Adliya idoralari masalalari sho‘basining yetakchi inspektori, 2014—2017-yillarda Prezident devoni Oliy Majlis, siyosiy va jamoat tashkilotlari bilan hamkorlik qilish xizmati Siyosiy partiyalar bilan hamkorlik qilish sho‘’basi mudiri bo‘lgan.
2017-yil avgustiga qadar Prezident devoni Siyosiy-huquqiy masalalar xizmati Sud-huquq sohasidagi qonunchilik sho‘’basi mudiri lavozimida faoliyat ko‘rsatgan. Shu yil 14-avgustida adliya vaziri o‘rinbosari etib tayinlangan. 2019-yil yanvarida esa uning lavozimi adliya vazirining birinchi o‘rinbosari darajasiga ko‘tarilgan. 2019-yil 23-iyulida esa Istamov Markaziy saylov komissiyasi raisi o‘rinbosari lavozimiga saylangan va o‘sha vaqtdan beri shu lavozimda ishlab kelayotgan edi.
Dilshod Fayziyev 2019-yil iyulidan beri Buxoro viloyati prokurori lavozimida ishlab kelayotgan edi. U o‘shanda Toshkent shahri prokurori etib tayinlangan Bahriddin Valiyev o‘rnini egallagan edi; tayinlovgacha u Buxoroda aynan Valiyevning birinchi o‘rinbosari bo‘lgan. 2020-yil dekabrida viloyatda Buxoro shahar prokurori Jasur Fozilov bilan bog‘liq shov-shuvli mojaro yuz bergan edi.
Izoh (0)