Бухоро вилояти прокурори Дилшод Файзиев «бошқа ишга ўтгани муносабати билан» лавозимидан озод қилинди. Унинг ўрнига шу вақтгача Марказий сайлов комиссияси раиси ўринбосари лавозимида ишлаб келган Маҳмуд Истамов Бухоро вилояти прокурори этиб тайинланди.
Маҳмуд Истамов 1979 йил 24 февралда Бухоро шаҳрида туғилган. 2000 йилда Тошкент давлат юридик институтини тамомлаган. Меҳнат фаолиятини 2000 йилда Адлия вазирлиги Идоравий меъёрий ҳужжатларни давлат рўйхатидан ўтказиш бошқармасининг катта маслаҳатчиси лавозимида бошлаган. Кейинчалик мазкур бошқармада бош маслаҳатчи, бўлим бошлиғи, бошқарма бошлиғи ўринбосари лавозимларида ишлаган.
2004—2005 йилларда Адлия вазирлиги ҳузуридаги Ҳуқуқий ахборот билан таъминлаш маркази раҳбари, 2005—2006 йилларда Адлия вазирлиги ҳузуридаги Норматив-ҳуқуқий ҳужжатларнинг амалга оширилиши устидан мониторинг қилиш маркази бўлими бошлиғи лавозимларида фаолият олиб борган. 2006 йилдан Президент девонига ишга ўтган.
Жумладан, 2006—2011 йилларда Президент девони Ҳуқуқни муҳофаза қилувчи ва назорат идоралари фаолиятини мувофиқлаштириш бўйича Давлат маслаҳатчиси хизматининг Адлия ва суд идоралари фаолияти масалалари бўйича инспектори, 2011—2014 йилларда Президенти девони Ҳуқуқни муҳофаза қилувчи ва назорат идоралари фаолиятини мувофиқлаштириш хизматининг Адлия идоралари масалалари шў’басининг етакчи инспектори, 2014—2017 йилларда Президент девони Олий Мажлис, сиёсий ва жамоат ташкилотлари билан ҳамкорлик қилиш хизмати Сиёсий партиялар билан ҳамкорлик қилиш шў’баси мудири бўлган.
2017 йил августига қадар Президент девони Сиёсий-ҳуқуқий масалалар хизмати Суд-ҳуқуқ соҳасидаги қонунчилик шў’баси мудири лавозимида фаолият кўрсатган. Шу йил 14 августида адлия вазири ўринбосари этиб тайинланган. 2019 йил январида эса унинг лавозими адлия вазирининг биринчи ўринбосари даражасига кўтарилган. 2019 йил 23 июлида эса Истамов Марказий сайлов комиссияси раиси ўринбосари лавозимига сайланган ва ўша вақтдан бери шу лавозимда ишлаб келаётган эди.
Дилшод Файзиев 2019 йил июлидан бери Бухоро вилояти прокурори лавозимида ишлаб келаётган эди. У ўшанда Тошкент шаҳри прокурори этиб тайинланган Баҳриддин Валиев ўрнини эгаллаган эди; тайинловгача у Бухорода айнан Валиевнинг биринчи ўринбосари бўлган. 2020 йил декабрида вилоятда Бухоро шаҳар прокурори Жасур Фозилов билан боғлиқ шов-шувли можаро юз берган эди.
Изоҳ (0)