Yunusoboddagi “Universam” ko‘prigining bir tomoni ta’mirlash ishlarini tezlashtirish uchun to‘liq yopildi

Toshkentning Ahmad Donish ko‘chasidagi ko‘prik 2 hafta davomida ta’mirlanishi ma’lum qilingandi. Poytaxt hokimligi matbuot xizmatining xabar berishicha, ta’mirlash ishlarini tezroq yakunlash maqsadida ko‘prikning bir tarafi avtotransport vositalarining qatnovi uchun to‘liq yopiladi.

17—14-yanvar kunlari ko‘prikning 7-sonli (oldingi 17-son) Shahar klinik shifoxonasidan “Yunusobod” metro bekati (mo‘ljal: “Universam”)gacha bo‘lgan oraliqda (ikki tomonlama yo‘lning bir tomoni),  14—21-yanvar kunlari ko‘prikning ikkinchi tomoni ta’mirlanishi belgilangan edi.

Xabarda ko‘ra, ta’mirlash ishlarini jadallashtirish, ishlarni tezroq yakunlash maqsadida ko‘prikning 7-sonli Shahar klinik shifoxonasidan Yunusobod metrosi yo‘nalishidagi qismi avtotransport vositalarining qatnovi uchun to‘liq yopiladi.

Hokimlik noqulayliklar uchun uzr so‘rab, tirbandliklarning oldini olish uchun haydovchilarga aylanma yo‘llar orqali harakatlanishni tavsiya etgan.

Eslatib o‘tamiz, 2020-yilning dekabrida Toshkentning Taxtapul mavzesidagi “tankodrom” ko‘prikning to‘xtab qolgan ta’miri bir oyga qolmay yakunlangandi.