O‘zbekistonda 2020-yilgi o‘lim statistikasi e’lon qilindi. Pandemiya yilida 20 ming “ortiqcha o‘lim” qayd etilgan

Davlat statistika qo‘mitasi O‘zbekistonning 2020-yil yakunlari bo‘yicha demografik holatiga doir raqamlarni e’lon qildi. E’lon qilingan ma’lumotlar orasida umumiy o‘lim holatlarga doir statistika ham bor (avvalroq qo‘mita bunday statistika 2021-yil yanvar oyi oxirigacha e’lon qilinishini bildirgan edi).

Unga ko‘ra, O‘zbekistonda 2020-yilda 175,6 migta o‘lim qayd etilgan bo‘lib, har 1000 aholiga o‘lim koeffitsiyenti 5,1 promilleni tashkil etgan va 2019-yilga nisbatan 0,5 promillega oshgan (2019-yilning yanvar—dekabr oylarida ko‘rsatkich 4,6 promille bo‘lgan).

2020-yilda qayd etilgan o‘lim holatlarining 60,0 foizi qon aylanish tizimi kasalliklaridan, 8,0 foizi o‘simtalardan, 7,2 foizi nafas olish a’zolari kasalliklaridan, 4,4 foizi ovqat hzm qilish a’zolari kasalliklaridan, 4,4 foizi baxtsiz hodisa, zaharlanish va jarohatlanishlardan, 4,4 foizi yuqumli va parazitar kasalliklardan hamda 11,6 foizi boshqa kasalliklardan vafot etgan.

2020-yilgi o‘lim holatlari soni bundan avvalgi so‘nggi besh yillikdagi o‘rtacha ko‘rsatkichdan 13 foizga (o‘rtacha 20 mingtaga ko‘p). Taqqoslash uchun, O‘zbekistonda 2015-yilda 152,0 mingta, 2016-yilda 154,7 mingta, 2017-yilda 160,7 mingta, 2018-yilda 154,9 mingta, 2019-yilda 154,6 mingta o‘lim holati qayd etilgan.

Hududlar kesimida ham 2020-yilgi o‘lim holatlari soni Andijon viloyatidan boshqa barcha joylarda rekord ko‘rsatkichni qayd etgan. Taqqoslash uchun, Toshkent shahrida o‘tgan yili 2019-yilga nisbatan 5,8 mingta, Toshkent viloyatida 2,4 mingta, Samarqand viloyatida 2 mingta ko‘proq o‘lim holatlari qayd etilgan.