Toshkent metropolitenining yangi bekatlari jihozlariga zarar yetkazish holatlari aniqlandi

Toshkent metropoliteni mol-mulkiga zarar yetkazish holatlari kuzatilmoqda, deya ma’lum qilingan shahar hokimligi tayyorlagan videoda.

Qayd etilishicha, nisbatan yaqinda ishga tushirilgan “Yunusobod” bekati o‘rindiqlari qirilganiga guvoh bo‘lish mumkin. Sergeli yo‘nalishidagi bekatlarda telefon quvvatlagichlarning simi uzilgani va kesilganini ko‘rish mumkin.

“Metropolitendan foydalanilayotgan vaqtda har xil vaziyatlar bo‘lmoqda. O‘rindiqlarga o‘tkir tig‘li buyumlar va ruchkalar bilan chizib ketishmoqda. Vagonlarda ham turli yozuvlarni ko‘rish mumkin.

Yangi bekatlarda aholi foydalanishi uchun o‘rnatilgan quvvatlagichlardan noto‘g‘ri foydalanilayotgani bois nosoz holga kelmoqda. Fuqarolardan foydalanilgan narsalardan boshqalar ham sifatli foydalanishiga imkon yaratishlarini iltimos qilib qolardik”, – deydi metropolitenning marketing bo‘limi xodimi Ilhomjon Qosimov.

Avvalroq Toshkent metrosida uzoqroq masofaga borgan yo‘lovchi ko‘proq pul to‘laydigan tartib joriy etilishi hamda Toshkent metropolitenidagi poyezdlarning harakatlanish orasidagi vaqt qisqargani haqida xabar berilgandi.