O‘zbekistonda Buyuk Britaniyada aniqlangan koronavirusning yangi shtammidan kasallangan bemor yo‘q. Bu haqda sog‘liqni saqlash vaziri Abuduhakim Hojiboyev “Daryo”ga ma’lum qildi.

Abduhakim Hojiboyev

Foto: "Daryo"

Eslatib o‘tamiz, Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mettyu Xenkok ma’lum qilgan. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfli emas.

Koronavirusning Angliyada aniqlangan yangi shtammi O‘zbekistonda hali aniqlangani yo‘q. Hozirda bizda ushbu shtammni yuqtirgan bemor yo‘q, – dedi sog‘liqni saqlash vaziri.

O‘zbekiston Sog‘liqni saqlash vazirligi koronavirusning yangi shtammi haqida 2020-yilning dekabr oyida ilk bor ma’lumot bergan edi. Unda aytilishicha, mutatsiyaning qanchalik keng ko‘lamda bo‘lishi virusning tarqaluvchanligi bilan bog‘liq, ya’ni kasallikni yuqtirgan har uchinchi, to‘rtinchi odamda bu virus mutatsiyasi kuzatiladi. Koronavirusga qarshi ishlab chiqilayotgan vaksinalar kasallikning yangi shtammiga ham ta’sir qiladi.

Vaksina immun tizimini virusning turli tarkibiy qismlariga hujum qilish uchun tayyorlaydi, bu esa tojning muayyan qismi mutatsiyaga uchrasa ham, vaksina samarasi saqlanib qolishini anglatadi. Dunyo olimlari virus vaksinaga qarshi tura oladigan mutantlarni keltirib chiqarsa, koronavirusga qarshi vaksinalarni kasallikka moslashtirib borish mumkinligi haqida aytishmoqda, deyiladi vazirlik axborotida.

Ma’lumot uchun, koronavirusning “britancha” shtammi 41 ta, “afrikacha” shtammi esa 7 ta mamlakatda aniqlangani, Britaniyada uchinchi lokdaun e’lon qilingani hamda Germaniyada koronavirus tufayli cheklovlar kuchaytirilgani haqida xabarlar berilgandi.