Qarshi shahri 7 kundan buyon suvsiz qolmoqda. Do‘konlarda ichimlik suvining litri 1000 so‘mga chiqdi

Qashqadaryo viloyatining Qarshi shahri yetti kundan buyon suvsiz qolmoqda. Shahardagi savdo do‘konlarida sotilayotgan ichimlik suvining litri esa 1000 so‘mga chiqdi. Bu haqda “Daryo” muxbiri xabar berdi.

Ta’kidlanishicha, shaharda ichimlik suvi 2020-yilning 21-oktabr kuni soat 17:00 da o‘chirilgan bo‘lib, 23-oktabr kuni soat 09:00 da qayta ulanishi va’da berilgan. Biroq, shaharga 28-oktabrda ham suv berilmagan.

“Bir-ikki kun suvsizlikka chidash mumkin. Ammo yetti kun suvsiz yashash judayam qiyin. Boz ustiga ko‘p qavatli uylarda”, — deydi shaharning 6-mitti tumanida istiqomat qiluvchi aholi vakillari.

“Qashqadaryo suv ta’minot” Qarshi shahar bo‘limi boshlig‘i Valisher Haydarovning aytishicha, shahar aholisining suvsiz qolishiga “1-son kompleks loyiha qurilish va montaj” xususiy korxonasi aybdor.

“‘1-son kompleks loyiha qurilish va montaj’ xususiy korxonasi shaharni uzluksiz ichimlik suvi bilan ta’minlashni nazarda tutuvchi loyihani qo‘lga kiritib, 16,5 milliard so‘m pul olgan va 1,5 km suv quvurini ta’mirlagan. Lekin quvur ta’mirlanganiga hech qancha vaqt bo‘lmasdan, 8 ta joyidan yorildi. Oqibatda biz shahar aholisiga berilayotgan suvni to‘xtatib, ta’mirlash ishlarini bajarishga majbur bo‘ldik”, — deydi Valisher Haydarov.

Ma’lum bo‘lishicha, inqirozga qarshi kurashish jamg‘armasi mablag‘lari hisobidan Qarshi shahri ichimlik suvi tizimini rekonstruksiya qilishga 16,5 milliard so‘m ajratilgan bo‘lib, mazkur mablag‘ evaziga shaharning Paxtazor, 4, 5, 6, 7-mitti tumanlari uzluksiz ichimlik suvi bilan ta’minlanishi ko‘zda tutilgan.

“Montaj ishlari shu yil avgust oyida bajarilgan edi. Ish chala bo‘lgani bois hech qancha vaqt o‘tmasdan yaroqsiz ahvolga keldi”, — deydi “Qashqadaryo suv ta’minot” Qarshi shahar bo‘limi boshlig‘i Valisher Haydarov.

Mas’ullar shahar aholisining suvsizlikdan qiynalib qolmasligi uchun ichimlik suvi tashuvchi avtomobillarda suv yetkazib berilayotganini ta’kidlashsa-da, amalda bu gaplar yolg‘on bo‘lib chiqmoqda. Buni viloyatda faoliyat yurituvchi blogerlar ham tasdiqlamoqda.

“Inson chiroqsiz amallab, sham yorug‘ida o‘tirishi mumkin, gaz bo‘lmasa, o‘tin yoqishi ham mumkin. Ammo suvsizlik, bu juda og‘ir masala. Ba’zida shaharda yashab turib, katta idishlarda suv tashiyotganlarni ko‘rsam, achinib ketaman, menimcha, eng birinchi navbatda eng zarur sohalarga e’tibor qaratish kerak, suv ta’minoti esa aynan mana shunday og‘riqli nuqtamiz. Menimcha, eng avvalo, mana shu og‘riqni davolash kerak. Poytaxtda sitilar yarqirab turganda viloyatdagilar Afrika davlatlaridagidek suv tashib yurishi haqiqatan yig‘latadigan holat”, — deydi bloger Otabek Artikov.

“Shuncha kun davomida ‘dom’imizga suv berilmadi. Suvsizlikdan juda qiynaldik. Savdo do‘konlarida suvning bir litri 1000 so‘mga chiqdi. 5 litrlik ichimlik suvini 5000 so‘mdan sotib oldik”, — deydi shaharning 6-mitti tumanida yashovchi aholi vakillari.

Svetlana Kulatova ismli fuqaro esa shaharning 6-mitti tumanida ichimlik suvi bir necha yildan buyon muammoli ekanligini aytmoqda.

“Murojaat qilmagan joyim qolmadi, birortasi telefonni ko‘tarmaydi. ‘Istiqlol’ mahallasi raisi ham, xususiy uy-joy mulkdorlari shirkati rasi ham telefonini o‘chirib qo‘ygan. Qashqadaryoda qachongacha suv muammo bo‘ladi. Biz qaysi asrda yashayapmiz o‘zi”, — deydi Svetlana Kulatova.

Yana bir bloger Husan Komiljonov esa “Yillar davomida Qarshi shahridagi suv quvurlarini almashtirishga ajratilgan milliardlab pullarning yeb ketilishi oqibatida shahar aholisi shunday ahvolga tushib qoldi”, deydi.

Mazkur ayblovlarga javob bergan “1-son kompleks loyiha qurilish va montaj” xususiy korxonasi rahbari Zayniddin Salomov suv quvurlarini yangilash uchun ularga 16,5 milliard emas, 15,5 milliard mablag‘ berilganini, qolaversa, suv quvuri 8 ta joydan emas, 1 ta joydan yorilib ketganini aytib, “Qashqadaryo suv ta’minot” Qarshi shahar bo‘limi boshlig‘i Valisher Haydarovning gapini rad etdi.

“Bizga ikkita joy yorilgan deb ko‘rsatishdi. Biz qo‘ygan ‘truba’lar emas, eski ‘truba’lar yorilgan ekan. Yana bir joyda muammo bo‘lib turibdi. Hozircha muammo aniq nimada ekanligi noma’lum. Ustalarimiz Jizzax viloyatidan edi. Ularni chaqirtirib, kamchilikni bartaraf etamiz. Hozirgi kamchilik sinov davridagi holat bo‘lib, bunday holat yuzaga kelishi tayin edi. Shunga qaramasdan, biz kamchiliklarni tez orada bartaraf etamiz”, — deydi Zayniddin Salomov.

Zayniddin Salomovning ma’lumot berishicha, qurilish tashkiloti ishni bajarguncha aytilgan mablag‘dan bir so‘m ham berilmagan. Ish tugatilgach mablag‘ning 30 foizi tashkilot hisob raqamiga o‘tkazilgan.

Suv ta’minoti va oqova suv obyektlari qurilishi bo‘yicha injiniring kompaniyasi viloyat hududiy boshqarmasi mas’uli Laziz Jo‘rayevning aniqlik kiritishicha, qurilish tashkilotiga avgust oyida bajargan ishi uchun 22-oktabr kuni umumiy mablag‘ning 30 foizi to‘lab berilgan. Qolgan mablag‘ esa ish yakunlangach beriladi.

“Daryo” suvsizlikdan qiynalayotgan aholi muammosi qanday yakunlanishini kuzatishda davom etadi.