Sony kompaniyasi 2021-yilning televizorlar lineykasi — Bravia XR’ni taqdim etdi. Ishlab chiqaruvchining so‘zlariga ko‘ra, bu “kognitiv intellekt”ga ega dunyodagi birinchi televizorlar hisoblanadi, deb yozadi IXBT.

Foto: Sony

Lineykadan 8K, 4K, shuningdek, 4K OLED ekranli modellar o‘rin olgan. Ular Cognitive Processor XR asosida yaratilgan. Sony’ning ta’kidlashicha, “kognitiv” protsessorlar xuddi “inson miyasi kabi” ishlaydi, bu esa ovoz va tasvirni o‘ta yuqori darajada real holatda yaratish imkonini beradi.

“Cognitive Processor XR intellektual protsessori bazasida yaratilgan yangiliklarda audiovizual ma’lumotlarni qayta ishlashda oddiy sun’iy intellekt algoritmlari imkoniyatidan tashqarida bo‘lgan innovatsion yechimdan foydalaniladi”, — deyiladi xabarda.

Sony Bravia XR 2021 lineykasi quyidagicha ko‘rinish olgan:

  • diagonali 85 va 75 dyuymga teng Z9J Master Series 8K (Full array LCD);
  • diagonali 83, 65 va 55 dyuymga teng A90J Master Series 4K (OLED);
  • diagonali 77, 65 va 55 dyuymga teng A80J 4K (OLED);
  • diagonali 85, 75 va 55 dyuymga teng X95J 4K (Full array LCD);
  • diagonali 100, 75, 65, 55 va 50 dyuymga teng X90J 4K (Full array LCD).

Foto: Sony

Televizorlar ovozli boshqaruvchiga ega yangi Google TV interfeysidan foydalanadi, shuningdek, 4K sifatni soniyasiga 120 ta yangilanish kadri orqali qo‘llab-quvvatlaydi. Google Assistant va Amazon Alexa ovozli yordamchilari funksiyasida ham ishlash imkoniyati mavjud.

Sony ushbu televizorlarning narxini 2021-yil bahorida e’lon qilish niyatida.