AQSh birinchi xonimi Melaniya Tramp apparatining rahbari, Oq uy sobiq matbuot kotibi Stefani Grishem iste’foga chiqdi. Bu haqda Oq uy vakiliga tayanib Meduza xabar berdi. Protokol masalalari bo‘yicha kotib Rikki Niseta hamda Oq uy matbuot kotibi o‘rinbosari Sara Mettyu ham shu kabi qarorlarni qabul qilgan.

Foto: EPA

CNN’ning ta’kidlashicha, Niseta va Grishem Tramp administratsiyasida ancha yillardan buyon ishlab kelgan. Grishem Tramp bilan 2015-yilgi saylovoldi kampaniyasi davrida birga ishlashni boshlagan, Niseta esa prezident administratsiyasida 2017-yildan buyon faoliyat ko‘rsatayotgan edi.

Tramp administratsiyasining xodimlari AQShning amaldagi prezidenti tarafdorlari 6-yanvar kuni Kongressga bostirib kirganidan so‘ng iste’foga chiqa boshladi. Kongress yig‘ilishida noyabrdagi saylovlarning yakuni tasdiqlanishi kerak edi.

Avvalroq Amerika hukumati a’zolari Donald Trampni muddatidan avval hokimiyatdan chetlashtirib, davlat rahbari vakolatlarini vitse-prezident Mayk Pensga topshirish imkoniyatini muhokama qilayotgani to‘g‘risida xabar berilgandi.

Ma’lumot uchun, 2021-yil 20-yanvar kuni saylangan davlat rahbari demokrat Jo Bayden o‘z lavozimiga kirishishi kerak. Dekabr o‘rtalarida saylovchilar hay’ati Trampning saylovdagi bosh raqibini Amerikaning 46-prezidenti deb e’lon qildi. Bayden saylovchilar hay’ati a’zolarining 300 dan ortiq ovozini, amaldagi prezident esa 230 dan ziyodroq ovozni qo‘lga kiritdi. Baydenning inauguratsiyasi an’anaga ko‘ra Vashingtonda bo‘lib o‘tadi.