Amerika hukumati a’zolari Donald Trampni muddatidan avval hokimiyatdan chetlashtirib, davlat rahbari vakolatlarini vitse-prezident Mayk Pensga topshirish imkoniyatini muhokama qilmoqda. Bu haqda CBS telekanali o‘z manbalariga tayanib xabar berdi, deb yozadi “RBK”.
Telekanal muxbiri jonli efirda ma’lum qilishicha, uning hamsuhbatlari so‘zlariga ko‘ra, Trampni hokimiyatdan chetlatish bo‘yicha yakuniy qaror qabul qilinganicha yo‘q, bunday rejalar muhokama bosqichida turibdi, xolos. Ijro etuvchi hokimiyat tizimidagi iyerarxiyaga muvofiq davlatdagi ikkinchi shaxs bo‘lgan AQSh vitse-prezidenti Mayk Pens bilan bu mavzu muhokama qilinganicha yo‘q.
Donald Trampning hokimiyatdan chetlatilishi AQSh Konstitutsiyasiga kiritilgan 25-tuzatish asosida yuz berishi mumkin. U davlat rahbarining layoqatsizligi holatida bunday ehtimolni nazarda tutadi. Bu holatda uning vakolatlarini yangi prezident saylangunicha vitse-prezident bajaradi.
CNN qayd etishicha, Vakillar palatasining Sud qo‘mitasi Pensga va Vazirlar Mahkamasiga yo‘naltirilgan murojaatida Donald Tramp ruhan nosog‘lom ekanini bildirgan. “Hatto bugun kunduzgi videomurojaatida ham prezident Tramp sog‘lom aql sohibi emasligini, 2020-yilgi saylov natijalarini hamon qabul qila olish holatida emasligini namoyish qildi”, — deyiladi murojaatda.
Prezident vakolatlarini muddatidan avval tugatish imkoniyatini muhokama qilish Vashingtondagi to‘qnashuvlar fonida bo‘lib o‘tmoqda, u yerda Trampning tarafdorlari AQSh Kongressi binosini shiddatli hujum bilan egalladi. Bu vaqtda Amerika parlamentida prezident saylovi natijalari tasdiqlanishi kerak bo‘lgan munozaralar o‘tkazilayotgan edi. Norozilik aksiyasi ishtirokchilarini bir necha soatdan keyingina ko‘zni yoshlantiruvchi gaz yordamida kongress binosidan siqib chiqarishga muvaffaq bo‘lishdi.
Eslatib o‘tamiz, Donald Tramp tarafdorlari 6-yanvar kuni Vashingtondagi Kongress binosiga bostirib kirdi. Ular Senat va Vakillar palatasi a’zolarining prezident saylovi yakunlarini tasdiqlash bo‘yicha o‘tkazayotgan qo‘shma majlisini to‘xtatib qo‘ydi. Prezident saylovida demokratlar nomzodi Jo Bayden g‘alaba qozongan edi.
To‘qnashuvlar vaqtida to‘rt kishi halok bo‘ldi. Halok bo‘lganlar orasida Kapitoliy binosida o‘qotar quroldan yaralangan ayol ham bor. Ushbu ma’lumot Vashington shahar politsiya departamenti tomonidan tasdiqlandi. Yana bir necha kishi, jumladan, politsiyachilar tan jarohati olgan. Jabrlanuvchilardan birining ahvoli og‘ir ekani aytilmoqda — u Kapitoliy devoriga chiqishga uringan vaqti 10 metr balandlikdan tushib ketgan.
Kapitoliyni egallab olgan odamlar maxsus kuchlar tomonidan tarqatib yuborildi. Kamida 52 kishi qo‘lga olingan. Oradan bir necha soat o‘tib, tartib qayta tiklangach, senator va kongressmenlarning qo‘shma majlisi qaytadan boshlandi.
Mavzuga doir:
- Trampning tarafdorlari Kapitoliyga bostirib kirdi. U yerda AQSh prezidenti saylovi yakunlari tasdiqlanishi kerak edi
- Trampning taraflari Kapitoliyni qanday qilib shturm bilan olganini ko‘ring. Bu — tarixiy kadrlar
- Trampni qo‘llab-quvvatlash uchun uyushtirilgan namoyish Kapitoliy shturmi bilan tugadi. To‘rt kishi halok bo‘ldi, yana bir nechasi tan jarohati oldi. Asosiy ma’lumotlar
- Trampning tarafdorlari Kapitoliyni egalladi, Jo Bayden esa buni isyonga tenglashtirdi. Vashingtondan fotosuratlar
Izoh (0)