6-yanvar kuni Vashington vaqti bilan soat 12:00 da prezidentlik saylovlarining yakuniy natijasi tasdiqlanishi kerak bo‘lgan AQSh Kongressining qo‘shma majlisi boshlandi. Alifbo bo‘yicha shtatlar ro‘yxatini saylovchilar o‘z ovozini demokrat Jo Bayden va uning vitse-prezidenti Kamala Xarrisga bergan Arizonagacha o‘qishga ulgurilgan. Respublikachilar partiyasining bir necha kongressmenlari o‘z e’tirozlarini bildirishga tushgan. Senat raisi, amaldagi vitse-prezident Maykl Pensning ko‘rsatmasiga binoan kongressmenlar ushbu e’tirozlarni muhokama qilish uchun o‘z palatalariga tarqalgan, deb yozadi Meduza.
Ular ushbu munozarani yakunlashga ulgurmagan. Kapitoliy binosi yaqinida Donald Tramp tarafdorlari miting uyushtirgan, unda amaldagi prezidentining shaxsan o‘zi ham ishtirok etgan. U mag‘lubiyatini hech qachon tan olmasligini ma’lum qilgan. Shundan so‘ng, Trampning yuzlab tarafdorlari Kapitoliyga bostirib kirishga uringan. Avvaliga politsiya va bino qo‘riqchilari bilan to‘qnashuvlar yuzaga kelgan, keyin esa ular Kapitoliyga bostirib kirishga muvaffaq bo‘lgan. Bino ichida bo‘lgan kongressmenlar va jurnalistlar evakuatsiya qilingan, Trampning tarafdorlari esa majlislar zali va kabinetlarni egallagan. To‘qnashuv oqibatida bir necha kishi jarohat olgan. Milliy gvardiya bo‘linmalari Vashingtonga safarbar etilgan.
“Demokratiyamiz misli ko‘rilmagan hujumga uchradi… Bu kelishmovchilik emas. Bu tartibsizlik. Bu qo‘zg‘olonga teng”, — deydi AQShning saylangan prezidenti Jo Bayden.
Mavzuga doir: Trampning taraflari Kapitoliyni qanday qilib shturm bilan olganini ko‘ring. Bu — tarixiy kadrlar
Foto: AFP
Ma’lumot uchun, 2021-yil 20-yanvar kuni saylangan davlat rahbari demokrat Jo Bayden o‘z lavozimiga kirishishi kerak. Dekabr o‘rtalarida saylovchilar hay’ati Trampning saylovdagi bosh raqibini Amerikaning 46-prezidenti deb e’lon qildi. Bayden saylovchilar hay’ati a’zolarining 300 dan ortiq ovozini, amaldagi prezident esa 230 dan ziyodroq ovozni qo‘lga kiritdi. Baydenning inauguratsiyasi an’anaga ko‘ra Vashingtonda bo‘lib o‘tadi.
Izoh (0)