Жаҳон соғлиқни сақлаш ташкилоти (ЖССТ) халқаро экспертларига Хитойда коронавируснинг келиб чиқишини тадқиқ қилиш учун рухсат берилмади. Бу ҳақда ЖССТ раҳбари Тедрос Аданом Гебрейесус маълум қилди, дейилади ташкилот хабарида.
ЖССТ раҳбари Хитой ҳукуматини экспертларнинг Хитойга келиши учун зарур рухсатномаларни расмийлаштирмаганликда айблади. «Жамоанинг икки аъзоси ўз сафарини аллақачон бошлагани, бошқалари эса Хитойга сўнгги дақиқада жўнаб кета олмаганини ҳисобга олиб, мен бу янгиликдан жуда ҳафсалам пир бўлди», — деди у.
Гебрейесуснинг айтишича, муаммони аллақачон Хитой ҳукумати билан муҳокама қилган ва улар томонидан Пекин зарур рухсатномаларни бериш жараёнини тезлаштиришига ишонтирилган. «Тадқиқот иложи борича тезроқ бошланишини хоҳлаймиз», — дея қўшиб қўйди у.
Янги турдаги коронавирус келтириб чиқарган COVID-19 пневмонияси биринчи марта 2019 йил охирида Хитойнинг Ухань шаҳрида қайд этилган эди. 2020 йил 11 мартда ЖССТ вазиятни пандемия деб аташ мумкинлигини маълум қилди. 2021 йил 6 январига келиб, коронавирусга чалиниш ҳолатлари дунёда 86 миллиондан ошди.
Аввалроқ АҚШ президентининг миллий хавфсизлик масалалари бўйича маслаҳатчиси ўринбосари Мэттью Поттингер коронавирус инфекцияси катта эҳтимол билан Хитойнинг Ухань шаҳридаги лабораториядан сизиб чиққани — касаллик манбаси ҳақидаги тахминлар орасида энг ишончга сазовори шу эканини айтган эди.
АҚШ президенти Дональд Трамп 2020 йил май ойи бошида берган баёнотида Хитой расмийларини касаллик тарқалишининг бошланғич даврида коронавирусга доир маълумотларни яширишда айблаган эди. Ўшанда Америка етакчиси вирус Ухандаги лабораторияда сунъий яратилганини тасдиқловчи далиллари борлиги ҳақида гапирган эди.
Бироқ АҚШ Давлат департаментининг Разведка ва тадқиқотлар бюроси далиллар йўқлиги учун бу версияни тасдиқламаган. Хитой эса Трампнинг айбловларига жавобан коронавирус лабораторияда ўйлаб топилганини рад этувчи ЖССТ хулосаларини кўрсатиб ўтган эди.
Изоҳ (0)