Leonid Yakubovich, Ivan Urgant va boshqa rossiyalik mashhur teleboshlovchilar qanday uylarda yashaydi? (foto)

Quyida nomi keltirilgan Rossiya teleboshlovchilarining shou-biznesda egallagan o‘rni ularga istalgan kattalikdagi turar joy xarid qilish imkonini beradi. Istiqomat qiladigan uylari va dala hovlilarining narxidan kelib chiqib, ularning qancha daromad topishini taxmin qilish qiyin emas.

Ivan Urgant

“Tungi Urgant” (“Vecherniy Urgant”) shousi boshlovchisi Ivan Urgantning Rublyovka shossesida 3 million dollarlik katta xonadoni bor. Ammo bu hali hammasi emas, boshlovchining “Gorki-1” posyolkasida ham maydoni 50 sotixni tashkil qiladigan kotteji bor. Klassik uslubdagi uy narxi 7 million dollarni tashkil qiladi.

Leonid Yakubovich

“Mo‘jizalar maydoni” boshlovchisi Leonid Yakubovichning “Penati” posyolkasidagi 7 million dollarlik uyi ko‘rinishi, teatr va madaniyat saroyini esga soladi. Band ish grafigi sabab boshlovchi kamdan kam bo‘ladigan uyda asosan qizi Varvara va rafiqasi yashaydi.

Yelena Malishyeva

“Yashash yaxshi” (“Jit zdorovo”) ko‘rsatuvi boshlovchisi Malishyevaning Nyu-Jersi shtatida xonadoni bor. 21 xonasi bor qasrni esga soladigan uy 6,4 million dollarni tashkil qiladi. Qimmatbaho buyumlar bilan dekoratsiyalangan uyda ulkan qandil, marmartoshlar mavjud. Bugungi kunda ushbu uyda Malishyevaning o‘g‘li yashaydi.

Vladimir Solovyov

Boshlovchi Moskva viloyatidagi dala hovlisi, ayniqsa, Italiyadagi villasida dam olishni yaxshi ko‘radi. “Gazeta.ru”ning ma’lum qilishicha, boshlovchining peshona terisi evaziga xarid qilgan Komo ko‘li bo‘yidagi uyining narxi 9 million yevroni tashkil qiladi. Keyinroq esa Navalniyning korrupsiyaga qarshi kurashish fondi tomonidan Komo ko‘li yoqasida 1 million yevrolik Solovyovga qarashli yana bir uy borligi aniqlagan.