O‘zbekistonda 2020-yilda yetti nafar sudya koronavirus infeksiyasi asoratlari oqibatida vafot etgan. Bu haqda O‘zbekiston Sudyalar Oliy kengashi matbuot xizmati “Daryo”ga ma’lum qildi.
Ma’lum qilishlaricha, o‘tgan yilda vakolati muddatidan ilgari tugatilgan o‘zbekistonlik sudyalarning to‘rt birini vafot etgan sudyalar tashkil etgan. Ulardan yetti nafari koronavirus infeksiyasi asoratlari oqibatida vafot etgan.
Bular:
- Serob Gulmurodovich Iskanov — G‘uzor tumanlararo iqtisodiy sudining raisi;
- Xayriddin Asamiddinovich Shermuhamedov — jinoyat ishlari bo‘yicha Toshkent viloyat sudi sudyasi;
- Shavkatjon To‘lqinboyevich Shodmonov — jinoyat ishlari bo‘yicha Andijon viloyat sudi sudyasi;
- Begdulla Jo‘ldasovich Auyezimbetov — Chimboy tuman ma’muriy sudi raisi;
- Muhammetdin Ismetullayevich Niyetullayev — jinoyat ishlari bo‘yicha Qorao‘zak tuman sudi raisi;
- Timur Ulug‘bekovich Ergashev — Toyloq tuman ma’muriy sudi raisi;
- Adham Ochilovich Qodirqulov — jinoyat ishlari bo‘yicha Toshkent tuman sudi sudyasi.
Ma’lumot uchun, O‘zbekiston Oliy sudi matbuot xizmati 1-avgust kuni sudya Xayriddin Shermuhamedov, 15-sentabr kuni sudya Shavkatjon Shodmonov, 22-sentabr kuni sudya Muhammetdin Niyetullayev, 28-sentabr kuni sudya Begdulla Auyezimbetov, 2-oktabr kuni sudya Timur Ergashev, 15-oktabr kuni sudya Adham Qodirqulov vafot etganini ma’lum qilgan, biroq olti holatda ham sudyalar o‘limiga aynan nima sabab bo‘lganini ochiqlamagan edi.
Faqat ikki holatda boshqa manbalar tomonidan bu sudyalarning koronavirus oqibatida vafot etgani bildirilgan. Xususan, Xayriddin Shermuhamedov vafoti arafasida koronavirusdan davolanish jarayonida bo‘lgani Sudyalar Oliy kengashi tomonidan ma’lum qilingan bo‘lsa, Shavkatjon Shodmonovning koronavirus oqibatida vafot etganini “Daryo”ning rasmiy doiralardagi manbasi tasdiqlagan.
Shuningdek, sudyalik qasamyodi va odob-axloq qoidalarini hamda odil sudlovni amalga oshirishda qonun talablarini qo‘pol ravishda buzgan 12 nafar sudya tizimdan chetlatilgan. “Ulardan biri jinoiy javobgarlikka tortilgan”, — deyiladi Sudyalar Oliy kengashi axborotida.
Mavzuga doir:
- Jinoiy ishlar bo‘yicha Chinoz tuman sudi raisi hibsga olindi
- Qarshida sudya 500 dollar pora bilan qo‘lga tushdi
- Toshkent viloyatida ozodlikni cheklash jazosini o‘tayotgan shaxsning ziyofatida qatnashgan sudyalar jarimaga tortilgan va lavozimi pasaytirilgan
- Urganch tumanlararo sudi sudyasi pora bilan qo‘lga tushdi
- Toshkentda 5 mingga yaqin soxta qaror chiqargan sudyalar ustidan qo‘zg‘atilgan jinoyat ishi bo‘yicha sud 11-dekabr kuni boshlanadi
Izoh (0)