O‘zbekiston Prezidenti Shavkat Mirziyoyev 30-dekabr kuni Tojikiston, Qozog‘iston, Turkmaniston, Qirg‘iziston va Rossiya rahbarlari bilan telefon orqali muloqot qildi. Bu haqda Prezident matbuot xizmati xabar qildi.
Dastlab Shavkat Mirziyoyev Tojikiston prezidenti Imomali Rahmon bilan muloqot qildi. Davlat rahbarlari kirib kelayotgan Yangi yil bilan bir-birlarini samimiy qutlab, O‘zbekiston va Tojikiston birodar xalqlariga tinchlik, farovonlik va ravnaq tiladi.
Suhbatda ikki tomonlama aloqalar va mintaqaviy ahamiyatga molik dolzarb masalalar muhokama qilindi, O‘zbekiston va Tojikiston o‘rtasidagi do‘stlik, yaxshi qo‘shnichilik va strategik sheriklik munosabatlarini yana-da mustahkamlashning birinchi galdagi vazifalari belgilandi.
Barqarorlik va xavfsizlikni ta’minlash, zamonaviy xatar va tahdidlarga qarshi kurashish masalalariga alohida e’tibor qaratildi.
Amaliy hamkorlikni chuqurlashtirish, jumladan, tovar ayirboshlashni ko‘paytirish, qo‘shma kooperatsiya loyihalarini ilgari surish, hududlararo va madaniy-gumanitar almashinuvni kengaytirish yuzasidan kelishuvlarga erishildi.
Davlat rahbarlari bo‘lajak ikki va ko‘p tomonlama tadbirlar rejasini ko‘rib chiqdilar. Shavkat Mirziyoyev Tojikiston prezidentiga 2021-yilda Shanxay hamkorlik tashkilotiga raislikda muvaffaqiyat tiladi.
Shuningdek, O‘zbekiston Prezidenti Qozog‘iston rahbari Qosim-Jo‘mart To‘qayev bilan ham muloqot qildi. Suhbat avvalida O‘zbekiston va Qozog‘iston prezidentlari bir-birlarini hamda ikki mamlakatning qardosh xalqlarini kirib kelayotgan yangi 2021-yil bilan samimiy tabrikladi, tinchlik, farovonlik va ravnaq tiladi.
O‘tayotgan yilning barcha xatar va qiyinchiliklariga qaramay, O‘zbekiston va Qozog‘iston o‘rtasidagi ko‘p asrlik do‘stlik rishtalari, yaxshi qo‘shnichilik va strategik sheriklik munosabatlarining izchil rivojlanishi ta’minlanganligi alohida ta’kidlandi.
Davlat rahbarlari ikki tomonlama hamkorlikni, shu jumladan, savdo portfelini yana-da kengaytirish, investitsiya loyihalari, sanoat, qishloq xo‘jaligi, transport va energetika sohalarida aloqalarni chuqurlashtirish lozimligini qayd etdi. Hududlar o‘rtasidagi yaqin hamkorlikni davom ettirish, madaniy-gumanitar almashinuvning keng dasturini amalga oshirishga katta e’tibor qaratildi.
Prezidentlar, shuningdek, mintaqaviy hamkorlik istiqbollari yuzasidan fikr almashib, bo‘lajak oliy darajadagi tadbirlar rejasini muhokama qildi.
O‘zbekiston rahbari Qozog‘iston prezidentiga 2021-yilda Yevrosiyo iqtisodiy ittifoqiga muvaffaqiyatli raislik qilishini tiladi.
Shu bilan birga, Shavkat Mirziyoyev Turkmaniston prezidenti Gurbanguli Berdimuhamedov bilan ham telefon orqali suhbatlashdi. Davlat rahbarlari bir-birlarini dildan qutlar ekan, kirib kelayotgan Yangi yil munosabati bilan samimiy tabriklar almashib, mamlakatlarning birodar xalqlariga tinchlik, farovonlik, baxt-saodat, muvaffaqiyat va ravnaq tiladilar.
Koronavirus pandemiyasi keltirib chiqargan global inqiroz oqibatlariga qaramay, yakuniga yetayotgan yilda O‘zbekiston va Turkmaniston o‘rtasidagi ko‘p asrlik do‘stlik rishtalariga, yaxshi qo‘shnichilik, o‘zaro hurmat va ishonch tamoyillariga, o‘xshash tarix, madaniy va ma’naviy qadriyatlar mushtarakligiga asoslangan strategik sheriklik munosabatlarini mustahkamlashda katta natijalarga erishilgani ta’kidlandi.
Davlat rahbarlari 2021-yilda ko‘p qirrali hamkorlikni kengaytirish bo‘yicha qo‘shma rejalarni, shuningdek, ikki tomonlama aloqalar va xalqaro tuzilmalar, avvalo, Birlashgan Millatlar Tashkiloti doirasidagi bo‘lajak tadbirlar rejasini atroflicha ko‘rib chiqdilar.
Prezidentlar savdo, sanoat, qishloq xo‘jaligi va transport sohalaridagi hamkorlikni kengaytirishga, kelgusi yilda ishbilarmonlik va madaniy tadbirlarga boy dasturni amalga oshirishga kelishib oldilar.
Yangi yilda Markaziy Osiyo davlatlari rahbarlarining navbatdagi Maslahat uchrashuviga tayyorgarlik ko‘rish masalalari ham muhokama qilindi.
Bundan tashqari O‘zbekiston Prezidenti Qirg‘iziston prezidenti vazifasini bajaruvchi Talant Mamitov bilan telefon orqali muloqot qildi.
Suhbat avvalida tomonlar kirib kelayotgan Yangi yil munosabati bilan bir-birlarini samimiy qutlab, ikki birodar xalqqa tinchlik, farovonlik va bardavom ravnaq tiladilar.
Talant Mamitov Shavkat Mirziyoyevga koronavirus pandemiyasiga qarshi kurashda ko‘rsatilgan katta ko‘mak va amaliy yordam, shu jumladan, Qirg‘iziston hududlarida mobil tibbiyot markazlarini qurish loyihalari amalga oshirilgani uchun chuqur minnatdorlik bildirdi.
Ikki mamlakat o‘rtasidagi do‘stlik, yaxshi qo‘shnichilik va ko‘p qirrali sheriklik aloqalarini izchil mustahkamlashning dolzarb masalalari ham muhokama qilindi.
O‘zbekiston–Qirg‘iziston hamkorligi kun tartibidagi muhim masalalarni, eng avvalo, sanoat kooperatsiyasi, savdo, iqtisodiyot va mintaqaviy transport yo‘laklarini rivojlantirish choralarini ilgari surish muhimligi qayd etildi.
Muloqot so‘ngida O‘zbekiston Prezidenti 2021-yil boshida Qirg‘izistondagi muhim ichki siyosiy tadbirlarni o‘tkazishda muvaffaqiyat tiladi.
Shuningdek, Shavkat Mirziyoyev va Rossiya prezidenti Vladimir Putin o‘rtasida ham telefon muloqoti bo‘lib o‘tdi. Ikki mamlakat rahbarlari bir-birlarini dildan qutlab, kirib kelayotgan yangi 2021-yil munosabati bilan samimiy tabriklar almashdilar, do‘st xalqlarga tinchlik, farovonlik va ravnaq tilaklarini izhor etdilar.
Koronavirusning global miqyosda tarqalishi bilan bog‘liq murakkab sharoitda davlatlarimiz pandemiyaga qarshi kurashish, jahon iqtisodiy va epidemiologik inqirozi oqibatlarini yengib o‘tishda bir-biriga har tomonlama yordamlashgani va amaliy ko‘mak ko‘rsatgani katta mamnuniyat bilan qayd etildi. Bugungi kunda O‘zbekistonda Rossiya vaksinasini ishlab chiqarish bo‘yicha kooperatsiya imkoniyatlari faol o‘rganilmoqda.
Yuzaga kelgan vaziyat va qiyinchiliklarga qaramay, barcha darajalardagi faol almashinuvlar davom ettirildi. Ikki tomonlama savdo ko‘rsatkichlari sezilarli o‘sishiga erishildi, sanoat kooperatsiyasi bo‘yicha qator yirik loyihalar va madaniy-gumanitar hamkorlik dasturlari yo‘lga qo‘yildi.
Suhbat chog‘ida prezidentlar mamlakatlar o‘rtasidagi do‘stlik, strategik sheriklik va ittifoqchilik munosabatlarini mustahkamlashga bundan buyon ham qat’iy intilishlari va bu borada birgalikdagi sa’y-harakatlarni davom ettirishlarini tasdiqladilar.
Kelgusi yil rejasiga kiritilgan ikki va ko‘p tomonlama tadbirlarga puxta tayyorgarlik ko‘rishga kelishib olindi.
O‘zbekiston va Rossiya rahbarlari xalqaro siyosat va mintaqaviy hamkorlikning dolzarb masalalari yuzasidan ham fikr almashdilar.
Shavkat Mirziyoyev, shuningdek, Qozog‘istonning birinchi prezidenti – elboshi Nursulton Nazarboyev bilan ham telefon orqali muloqot qildi.
O‘zbekiston Prezidenti va Nursulton Nazarboyev kirib kelayotgan Yangi yil munosabati bilan samimiy tabriklar almashib, bir-birlariga hamda O‘zbekiston va Qozog‘istonning do‘st xalqlariga farovonlik va ravnaq tiladilar.
Global xatar va tahdidlar kuchayib borayotgan, jahon iqtisodiyotida murakkab vaziyat yuzaga kelgan bir sharoitda mamlakatlarimiz o‘rtasidagi do‘stlik, yaxshi qo‘shnichilik va strategik sheriklik munosabatlari barqaror rivojlanishda davom etgani, sifat jihatidan yangi mazmun bilan boyigani katta mamnuniyat bilan qayd etildi.
Pandemiyaga qarshi kurashishda o‘zaro yordam ko‘rsatildi. Faol ikki tomonlama muloqotlar, iqtisodiyotning turli tarmoqlarida qo‘shma kooperatsiya loyihalari davom etdi, hududlararo va madaniy-gumanitar almashinuvlar kengaydi.
Xalqaro ahamiyatga molik dolzarb masalalar ham ko‘rib chiqildi. Kelgusi yilda Markaziy Osiyo davlatlari rahbarlarining navbatdagi Maslahat uchrashuvini o‘tkazish muhim ekani ta’kidlandi.
Avvalroq Shavkat Mirziyoyev Ko‘ksaroyda bir guruh vatandoshlarga davlat mukofotlarini topshirgani, “Vatandoshlar” jamg‘armasini tashkil etish va 30-iyulni O‘zbekistonda “Xalqlar do‘stligi kuni” deb belgilashni taklif qilgani hamda 2021-yilni Yoshlarni qo‘llab-quvvatlash va aholi salomatligini mustahkamlash yili deb e’lon qilgani haqida xabar berilgandi.
Izoh (0)