Xalqaro kongress markazida Prezident Shavkat Mirziyoyevning Oliy Majlisga va O‘zbekiston xalqiga Murojaatnomasi bo‘lib o‘tmoqda. Davlat rahbari o‘z chiqishi avvalida pandemiya vaqtida qabul qilingan choralarni sanab o‘tdi. Prezidentning so‘zlariga ko‘ra, pandemiya davrida butun boshqaruv tizimi va barcha tibbiyot muassasalari favqulodda ish rejimiga o‘tkazilgan.
Qayd etilishicha, qisqa muddatda Toshkent shahri va hududlarda barcha sharoitlarga ega bo‘lgan qariyb 30 ming o‘rinli davolash maskanlari tashkil etilgan, ular zarur dori-darmon, himoya va eng zamonaviy diagnostika vositalari bilan ta’minlangan. Pandemiyaga qarshi kurashish uchun 200 mingdan ziyod tibbiyot xodimi, jumladan, chet ellik 150 nafar yuqori malakali shifokor va mutaxassis jalb etilgan.
“Xorijdan 600 mingdan ortiq vatandoshimiz yurtimizga olib kelindi. Chet elda qiyin ahvolga tushib qolgan 100 mingga yaqin fuqarolarimizga zarur yordamlar ko‘rsatildi”, — deydi Shavkat Mirziyoyev.
Pandemiya oqibatlarini yumshatish va bartaraf etish uchun davlat tomonidan jami 82 trillion so‘mlik kompleks chora-tadbirlar amalga oshirilgan. Jumladan, Inqirozga qarshi jamg‘arma tashkil etilib, koronavirusga qarshi kurashish, aholi va korxonalarni qo‘llab-quvvatlash bilan bog‘liq tadbirlarga budjetdan 16 trillion so‘mdan ortiq mablag‘ yo‘naltirilgan.
Shuningdek, davlat korxonalariga va 500 mingdan ziyod tadbirkorlik subyekti hamda qariyb 8 million fuqaroga jami 66 trillion so‘mlik soliq imtiyozlari, kredit muddatlarini uzaytirish va moliyaviy qo‘llab-quvvatlash bo‘yicha amaliy yordamlar berilgan.
“Saxovat va ko‘mak” umumxalq harakati doirasida 800 mingdan ziyod ehtiyojmand oilalarga 1 trillion so‘mdan ortiq moddiy yordam ko‘rsatilgan.
Davlat rahbarining ta’kidlashicha, pandemiya sog‘liqni saqlash va sanitariya-epidemiologiya xizmati sohasini birinchi navbatda isloh qilish naqadar muhimligini ko‘rsatib bergan.
O‘z paytida ko‘rilgan tezkor va tizimli choralar natijasida ushbu xatarli kasallikning keng tarqalishiga yo‘l qo‘yilmadi. O‘zbekistonda osoyishta hayot, barqaror iqtisodiy rivojlanish davom etmoqda.
“Karantin talablarini to‘g‘ri qabul qilib, ularga amal qilgan, sabr-toqatli, olijanob xalqimizga, o‘ta xatarli vaziyatda o‘zini ayamasdan mardona mehnat qilgan jonkuyar shifokorlarga, ‘Saxovat va ko‘mak’ umumxalq harakatida munosib ishtirok etgan barcha tadbirkor va fuqarolarimizga yana bir bor o‘zimning chuqur minnatdorchiligimni izhor etaman”, — deydi Shavkat Mirziyoyev.
Izoh (0)