Халқаро конгресс марказида Президент Шавкат Мирзиёевнинг Олий Мажлисга ва Ўзбекистон халқига Мурожаатномаси бўлиб ўтмоқда. Давлат раҳбари ўз чиқиши аввалида пандемия вақтида қабул қилинган чораларни санаб ўтди. Президентнинг сўзларига кўра, пандемия даврида бутун бошқарув тизими ва барча тиббиёт муассасалари фавқулодда иш режимига ўтказилган.
Қайд этилишича, қисқа муддатда Тошкент шаҳри ва ҳудудларда барча шароитларга эга бўлган қарийб 30 минг ўринли даволаш масканлари ташкил этилган, улар зарур дори-дармон, ҳимоя ва энг замонавий диагностика воситалари билан таъминланган. Пандемияга қарши курашиш учун 200 мингдан зиёд тиббиёт ходими, жумладан, чет эллик 150 нафар юқори малакали шифокор ва мутахассис жалб этилган.
«Хориждан 600 мингдан ортиқ ватандошимиз юртимизга олиб келинди. Чет элда қийин аҳволга тушиб қолган 100 мингга яқин фуқароларимизга зарур ёрдамлар кўрсатилди», — дейди Шавкат Мирзиёев.
Пандемия оқибатларини юмшатиш ва бартараф этиш учун давлат томонидан жами 82 триллион сўмлик комплекс чора-тадбирлар амалга оширилган. Жумладан, Инқирозга қарши жамғарма ташкил этилиб, коронавирусга қарши курашиш, аҳоли ва корхоналарни қўллаб-қувватлаш билан боғлиқ тадбирларга бюджетдан 16 триллион сўмдан ортиқ маблағ йўналтирилган.
Шунингдек, давлат корхоналарига ва 500 мингдан зиёд тадбиркорлик субъекти ҳамда қарийб 8 миллион фуқарога жами 66 триллион сўмлик солиқ имтиёзлари, кредит муддатларини узайтириш ва молиявий қўллаб-қувватлаш бўйича амалий ёрдамлар берилган.
«Саховат ва кўмак» умумхалқ ҳаракати доирасида 800 мингдан зиёд эҳтиёжманд оилаларга 1 триллион сўмдан ортиқ моддий ёрдам кўрсатилган.
Давлат раҳбарининг таъкидлашича, пандемия соғлиқни сақлаш ва санитария-эпидемиология хизмати соҳасини биринчи навбатда ислоҳ қилиш нақадар муҳимлигини кўрсатиб берган.
Ўз пайтида кўрилган тезкор ва тизимли чоралар натижасида ушбу хатарли касалликнинг кенг тарқалишига йўл қўйилмади. Ўзбекистонда осойишта ҳаёт, барқарор иқтисодий ривожланиш давом этмоқда.
«Карантин талабларини тўғри қабул қилиб, уларга амал қилган, сабр-тоқатли, олижаноб халқимизга, ўта хатарли вазиятда ўзини аямасдан мардона меҳнат қилган жонкуяр шифокорларга, ‘Саховат ва кўмак’ умумхалқ ҳаракатида муносиб иштирок этган барча тадбиркор ва фуқароларимизга яна бир бор ўзимнинг чуқур миннатдорчилигимни изҳор этаман», — дейди Шавкат Мирзиёев.
Изоҳ (0)