«Ўлаётганим ва бир ойлик умрим қолгани ҳақида ёзишди». Женнаро Гаттузога нималар бўлмоқда?

Сўнгги ҳафталарда Италиянинг «Наполи» клуби бош мураббийи Женнаро Гаттузо жамоани кўзини боғлаб олган ҳолда бошқармоқда. А Серия 14-туридан ўрин олган «Торино»га қарши ўйиндан сўнг эса италиялик мутахассис соғлиғида муаммолар борлигини тан олишга журъат этди.

«Менда аутоиммун хасталик мавжуд, бу кўз миастенияси, — деди Гаттузо кўзидаги боғични ечиб. — Сўнгги 10 кун ичида мен ўзимда эмасдим. Бундай ҳолатда ўзингизни бутунлай тамом бўлгандек ҳис қиласиз. Кунига 24 соат кўриш борасидаги муаммолар жуда чарчатади. Фақат мен каби тентак шу ҳолатда ҳам ишлашда давом этиши мумкин.

Ҳозир ойнага қараганида ўз камчилигини кўрадиганлар, айниқса, болаларга мурожаат қилмоқчиман: хавотир олманг, ҳаёт жуда гўзалдир. Ва сиз унинг юзига қўрқмасдан тик қарай олишингиз керак.

Гарчи буни жамоа ўйинчиларидан яширишга ҳаракат қилган бўлсам-да, улар бу ҳолимдан хавотирга тушди. Ўзим билан қаттиқ олишдим. Одамлар мени бундай ҳолатда кўраётганидан ҳам ўзимда эмасман. Бироқ уни қабул қилиш керак, чунки ҳаётда бундан-да ёмонроқ вазиятлар бўлиши мумкин.

Ҳатто бир ой умрим қолгани ҳақида миш-мишларни эшитдим, нима бўлган тақдирда ҳам ҳали тирикман ва ишончингиз комил бўлсинки, ўлмайман. Бу хасталик билан 10 йилдан бери яшаб келаман, у менга учинчи марта ҳамла қилмоқда ва бу сафаргиси кучли зарба бўлди. Албатта, ҳаммаси ортда қолади ва мен яна ўз ҳолимга қайтаман. Бундай кўриниш ўзимга ҳам ёқимсиз туйилмоқда, бироқ бу ўтиб кетади«.

Хўш, қандай касаллик ўзи бу?

Миастения — аутоиммун хасталик бўлиб, унда қовоқ мушаклари заифлашиши, кўзолди тасвирининг хиралашиши, талаффуздаги бузилишлар, чайнов мушакларининг сустлашиши, ютинишнинг қийинлашиши, бўйинда оғирлик, қўл-оёқларнинг кучсизланиши каби белгилар билан кечади.

Гаттузо 10 йилдан бери касалликдан азият чекиб келади

Ринода ушбу хасталик 10 йил олдин аниқланган. У ўша вақтлар футболчи сифатида «Милан» шарафини ҳимоя қиларди. Маълумотларига кўра Женнаро 2011/2012 йилги мавсумда айнан оптик асаб фалажи туфайли 309 кунни ўтказиб юборган.

«Чап кўзимда кўриш билан боғлиқ муаммолар бор. Шифокорлар ҳозирча операция қилишни тавсия этмаяпти, бунга эҳтиёж бор ё йўқлигини аниқ айтиш учун олти ой кутиш керак. Аммо яхши томонга ўзгариш бор. Аввалига тўртта Ибрагимовични кўраётгандим, кейин учта, ҳозир эса кўзим уларнинг иккитасини кўрмоқда», — деганди ўшанда Женнаро.

Шифокорлар Гаттузонинг қандай касалликдан азият чекаётганини аниқлаш учун узоқ вақт давомида бош қотирди. Фақатгина бир йил ўтгач аниқ ташхис қўйилди — кўз миастенияси.

Навбатдаги ҳамла эса Европа Лигаси гуруҳ босқичидан ўрин олган «Реал Сосьедад»га қарши ўйин вақтида рўй берди. Мутахассис ўйинни боғланган кўз билан якунлади. Гаттузо матбуот анжуманига ҳам келмади — кела олмади.

Хуруждан кейин касалликка қарши курашиш учун италиялик ўнг кўзига ҳимоя кўзойнаги ва боғич тақишни бошлади. «Торино»га қарши ўйиндан сўнг эса Гаттузо уларни ечиб, футбол оламига қовоқларининг шишиб кетганини кўрсатди: юмшоқроқ қилиб айтганда, ушбу ҳолатда Женнарони кўркам дейиш бироз мушкул эди.

Бироз бўлса-да, хурсанд қиладиган жиҳат шуки, Рино аниқ тушкунликка тушиб қоладиган инсон эмас. У ҳар доим жангчи бўлиб келган.

Бардам бўл, мистер!