Samarqand shahrining “So‘zangaron” mahallasi hududidan “Shaar-tashlama” nomli ariq oqib o‘tadi. Bundan sakkiz yil avval uning o‘zanini shu mahallada yashovchi Suhrob Muhammadiyev o‘zboshimchalik bilan, balandligi 1,5 metr va uzunligi 25 metr bo‘lgan beton devor quyish orqali o‘zgartirgan. Muhammadiyevning qo‘shni Jo‘rabek Davronovning “Daryo”ga ma’lum qilishicha, so‘nggi to‘rt yildan beri yog‘ingarchilik ko‘paygani sabab sakkiz yil avvalgi o‘zan o‘zgarishi o‘zini yomon tomondan ko‘rsatmoqda — har yomg‘irdan so‘ng mahalla yo‘llari va uylar, xususan, Davronovning ham uyi suv ostida qoladi.
“Telegram orqali Samarqand viloyati hokimi Erkinjon Turdimovga murojaat qilganimdan so‘ng barcha mutasaddi tashkilotlar tomonidan ushbu masala atroflicha o‘rganilgandi. Ariqning o‘zaniga kiritilgan o‘zgarish tabiiy ofatlarga olib kelishi bo‘yicha tegishli tashkilotlar xulosa ham bergan. Ammo noqonuniy ravishda ariqning o‘zanini o‘zgartirgan qo‘shnim qurilishni buzishga qarshilik qildi”, — deydi Jo‘rabek Davronov.
Uning ta’kidlashicha, tegishli tashkilotlar hech qanday chora ko‘rmagach, otasi Bahrom Davronov sudga murojaat qilgan. 2020-yil 13-yanvarida fuqarolik ishlari bo‘yicha Samarqand shahar sudi Suhrob Muhammadiyevning zimmasiga “Shaar-tashlama” arig‘ining o‘zanini tabiiy yo‘nalishiga qaytarish majburiyati yuklash haqida qaror chiqargan. 21-may kuni fuqarolik ishlari bo‘yicha viloyat sudining kassatsiya instansiyasida ish qayta ko‘rilib, shahar sudining hal qiluv qarori o‘zgarishsiz qoldirilgan.
“Oradan shuncha vaqt o‘tsa-da, sud qarorining ijrosi ta’minlanmadi. Shundan so‘ng 7-sentabr kuni viloyat hokimi Erkinjon Turdimovning sayyor qabuliga borishga majbur bo‘ldim. Hokim murojaatimni tinglab, viloyat MIB boshlig‘i Alisher Zokirovga bir hafta ichida ariq o‘zanini o‘zgartirib, noqonuniy qurilgan betonlarni olib tashlashni buyurdi. Hokimi MIB boshlig‘iga: ‘Agar buza olmasangiz, o‘zim borib buzaman’, degandi. Ammo ijro turli bahonalar bilan ta’minlanmadi”, — deydi Davronov.
Oradan bir oy o‘tgach, Davronov yana hokim qabuliga borgan. Bu safar uni MIB xodimlari qabul kiritmaslikka harakat qilib, “Qabulga kirmang, ariqni o‘zimiz borib, buzdirib beramiz”, deb va’da bergan.
“Shundan so‘ng, 14-oktabrda ijrochilar keldi. Qo‘shnim bir haftada daraxtlarni olib, betonlarni buzaman deb, hammani aldadi. MIBchilar old tomondagi betonlarni ozgina buzib, so‘ng ketdi. Shu bilan ular qaytmadi. MIBga borsam, erta-indin deb, aldab yuribdi. Ijrochilar ariq bo‘yidagi daraxtlarni bahona qildi. Ekologiya boshqarmasidan ruxsatnoma olib kelganimdan keyin ham ijroni bajarishmadi. Byuroga boraman-kelaman, qo‘ng‘iroq qilaman, natija yo‘q. Hali bunisi qarindosh chiqadi, hali unisi tanish chiqadi, hali bunisi bilan oldi-berdisi bor. Xullas, ijro bajarilmayapti”, — dedi Davronov.
2020-yil aprelida Samarqand shahar hokimi hamda shahar prokurori boshchiligida tegishli tashkilotlar tomonidan “Shaar-tashlama” arig‘ining “Bog‘i Mirzo” va “Qo‘shchinor” mahallaridan oqib o‘tgan qismida obodonlashtirish, kanal atrofida muhofaza hududini tashkil etish ishlari amalga oshirilgan.
“Ammo biz ariqda noqonuniy qurilish ishlari olib borilganligi bo‘yicha barcha tegishli tashkilotlarning xulosalari, hatto sud qarorini olgan bo‘lsak-da, ikki yildan buyon ariqni tozalash, noqonuniy qurilishni buzish bo‘yicha hech qanday ishni amalga oshira olmayapmiz. Viloyat hokimning Telegram’ga murojaat qilinganimiz ham, sayyor qabulida bo‘lganimiz ham foyda bermadi”, — deydi fuqaro.
Mavzuga doir: Kun fotosi: Samarqandda beligacha suvga botgan niqobli xodimlar bemor ayolni zambilda olib ketyapti
Hamma bir ovozdan: “Tabiiy o‘zanni qayta tiklash kerak!”
Fuqaro Davronov 2018-yil iyunidan beri ariqning o‘zanini o‘zgartirish bo‘yicha turli tashkilotlarga murojaat qiladi. Ma’lum bo‘lishicha, Samarqand shahar qurilish bo‘limi ariq o‘zani o‘zgargani, uning hududida tabiiy ofatlarga olib kelish ehtimolini oldini olish maqsadida 2018-yilning 30-iyun kuni yo‘riqnoma orqali Suhrob Muhammadiyevga umumiy foydalanishdagi ariqni o‘z holiga qaytarish yuzasidan ogohlantirish bergan.
Shuningdek, Samarqand viloyat Favqulodda vaziyatlar boshqarmasi 2018-yil 25-dekabrda viloyat hokimiga yo‘llagan xatida ham fuqaro Suhrob Muhammadiyev ariqning o‘zanini uch metrga o‘zgartirilgani ma’lum qilinib, “Shaar-tashlama” arig‘ining tabiiy o‘zanini ruxsatsiz o‘zgartirgani uchun uni o‘z o‘z hisobidan tabiiy holatiga qaytarishi lozimligi bildirilgan.
Suv xo‘jaligi vazirligi Zarafshon irrigatsiya tizimlari havza boshqarmasining 2018-yil 25-dekabrdagi viloyat hokimigiga yo‘llagan xatida ham “So‘zangaron” mahallasidan o‘tuvchi “Shaar-tashlama” arig‘ida 2008—2010-yillarda fuqaro Suhrob Muhammadiyev tomonidan 25 metr uzunlikda, 1,5 metr balandlikda beton qurilish ishlari olib borilib, uning o‘zaniga o‘zgartirish kiritilganligini ma’lum qilingan.
2019-yil 12-aprel kuni Samarqand shahar hokimligi ham “Shaar-tashlama”ning tabiiy o‘zani o‘zgartirilganligi, bu holat ofatlarga olib kelishi mumkinligi, ariqni tabiiy o‘zaniga qaytarish bilan suv toshqinlarining oldini olish mumkinligini bildirgan.
Samarqand shahar Sanitariya-epidemologik osoyishtalik markazining fuqarolik ishlari bo‘yicha Samarqand shahar sudiga 2019-yil 24-dekabrda yo‘llagan xatida fuqaro Suhrob Muhammadiyev ariq o‘zanini 3 metrga o‘zgartirgani uchun fuqaro Bahrom Davronovga tegishli uy-joy va uning yashash xonalari devorlariga zarar yetgani, devorlar sanitariya qoida va normalariga javob bermasligini bildirgan.
Samarqand shahar qurilish bo‘limi tomonidan 2019-yil 26-dekabr kungi fuqarolik ishlari bo‘yicha Samarqand shahar sudiga chiqarilgan xatda ta’kidlanishicha, “Shaar-tashlama” ichki ariq hisoblanib, “So‘zangaron”, “Abdulla Qahhor”, “Sharq”, “Fidoyilar” mahallalaridan oqib o‘tadi va uning yo‘nalishini mutasaddilar bilan kelishmagan holda o‘zgartirish mumkin emas. Shahar qurilish bo‘limining xatida qayd etilishicha, fuqaro Suhrob Muhammadiyev ariqni o‘z holiga qaytarish lozim.
Izoh (0)