Ishiga qaytgan Buxoro shahar prokurori qonunni buzgani uchun jazolangan. Shunga qaramay u “tekshiruv natijasidan qanoatlandi”

Buxoro shahar prokurori Jasur Fozilovga nisbatan tayinlangan xizmat tekshiruvi davom etadi. Bu haqda uning o‘zi “Daryo” muxbiriga bergan intervyusida aytib o‘tdi.

20-dekabr oqshomida Buxoro shahar prokurori Jasur Fozilov o‘z xizmat vazifasini bajarishga qayta kirishgani haqida xabarlar tarqaldi, Bosh prokuratura matbuot xizmati bu xabarlarni tasdiqladi. U 2-dekabr kuni Buxoro tadbirkorning shahar prokurori ustidan yozgan arizasi sabab tayinlangan xizmat tekshiruvini xolisona olib borish maqsadida vazifasidan vaqtincha chetlatilgan edi.

Jasur Fozilov xizmat vazifasidan vaqtincha chetlatilgach, bir necha kun davomida ijtimoiy tarmoqlar orqali (jumladan, Prezident Shavkat Mirziyoyevga) murojaatlar qilgan, xususan, Bosh prokuratura mas’ullari ham turli shubhali ishlarga aralashgan bo‘lishi mumkinligi haqida bayonotlar bergan edi. Uning bu murojaatlari yuzasidan Respublika idoralararo komissiyasi tuzilgan edi.

Prokuror Fozilovning alohida ta’kidlashicha, komissiyaning “xizmat tekshiruvi bilimdon va o‘z sohasining tajribali mutaxassislari tomonidan o‘tkazilgan”. Tekshiruv natijasiga ko‘ra, Fozilovning tadbirkorlarni tergovga chaqirishda qonun talablarini buzgani aniqlangan va ushbu holat yuzasidan unga nisbatan intizomiy jazo qo‘llanishi to‘g‘risida qaror qabul qilingan.

“Xizmat tekshiruvi xulosasi meni qanoatlantirdi”, — deydi Buxoro shahri prokurori. U bunday “adolatli qaror” chiqarilishiga turtki bergani uchun jurnalist va blogerlarga minnatdorchilik bildirgan.

“Men lavozimimga tiklanmadim, balki, tekshiruv natijasiga ko‘ra, vazifamni 21-dekabrdan yana davom ettirishga kirishdim. Biroq bu hammasi tugadi, degani emas. O‘zimga nisbatan ham, ilgari “Daryo”ga bergan intervyumda aytib o‘tilgan ayrim shaxslarga nisbatan ham tekshiruvlar to‘xtamagan. Tekshiruvlar yakunlangach, qo‘llanilgan jazo choralari haqida qo‘shimcha axborot beriladi, albatta...”, — dedi Fozilov.

Prokuror o‘zi qayd etib o‘tgan holatlar bo‘yicha tekshiruvlar Respublika idoralararo komissiyasi tomonidan adolatli davom ettirilayotganini alohida ta’kidladi. “Qonunbuzilishiga yo‘l qo‘yganlar, baribir, javob beradi. Bu qonunchilikda bor narsa”, — deya qo‘shimcha qildi u.