Самарқанд шаҳрининг «Сўзангарон» маҳалласи ҳудудидан «Шаар-ташлама» номли ариқ оқиб ўтади. Бундан саккиз йил аввал унинг ўзанини шу маҳаллада яшовчи Суҳроб Муҳаммадиев ўзбошимчалик билан, баландлиги 1,5 метр ва узунлиги 25 метр бўлган бетон девор қуйиш орқали ўзгартирган. Муҳаммадиевнинг қўшни Жўрабек Давроновнинг «Дарё»га маълум қилишича, сўнгги тўрт йилдан бери ёғингарчилик кўпайгани сабаб саккиз йил аввалги ўзан ўзгариши ўзини ёмон томондан кўрсатмоқда — ҳар ёмғирдан сўнг маҳалла йўллари ва уйлар, хусусан, Давроновнинг ҳам уйи сув остида қолади.
«Telegram орқали Самарқанд вилояти ҳокими Эркинжон Турдимовга мурожаат қилганимдан сўнг барча мутасадди ташкилотлар томонидан ушбу масала атрофлича ўрганилганди. Ариқнинг ўзанига киритилган ўзгариш табиий офатларга олиб келиши бўйича тегишли ташкилотлар хулоса ҳам берган. Аммо ноқонуний равишда ариқнинг ўзанини ўзгартирган қўшним қурилишни бузишга қаршилик қилди», — дейди Жўрабек Давронов.
Унинг таъкидлашича, тегишли ташкилотлар ҳеч қандай чора кўрмагач, отаси Баҳром Давронов судга мурожаат қилган. 2020 йил 13 январида фуқаролик ишлари бўйича Самарқанд шаҳар суди Суҳроб Муҳаммадиевнинг зиммасига «Шаар-ташлама» ариғининг ўзанини табиий йўналишига қайтариш мажбурияти юклаш ҳақида қарор чиқарган. 21 май куни фуқаролик ишлари бўйича вилоят судининг кассация инстанциясида иш қайта кўрилиб, шаҳар судининг ҳал қилув қарори ўзгаришсиз қолдирилган.
«Орадан шунча вақт ўтса-да, суд қарорининг ижроси таъминланмади. Шундан сўнг 7 сентябрь куни вилоят ҳокими Эркинжон Турдимовнинг сайёр қабулига боришга мажбур бўлдим. Ҳоким мурожаатимни тинглаб, вилоят МИБ бошлиғи Алишер Зокировга бир ҳафта ичида ариқ ўзанини ўзгартириб, ноқонуний қурилган бетонларни олиб ташлашни буюрди. Ҳокими МИБ бошлиғига: ‘Агар буза олмасангиз, ўзим бориб бузаман’, деганди. Аммо ижро турли баҳоналар билан таъминланмади», — дейди Давронов.
Орадан бир ой ўтгач, Давронов яна ҳоким қабулига борган. Бу сафар уни МИБ ходимлари қабул киритмасликка ҳаракат қилиб, «Қабулга кирманг, ариқни ўзимиз бориб, буздириб берамиз», деб ваъда берган.
«Шундан сўнг, 14 октябрда ижрочилар келди. Қўшним бир ҳафтада дарахтларни олиб, бетонларни бузаман деб, ҳаммани алдади. МИБчилар олд томондаги бетонларни озгина бузиб, сўнг кетди. Шу билан улар қайтмади. МИБга борсам, эрта-индин деб, алдаб юрибди. Ижрочилар ариқ бўйидаги дарахтларни баҳона қилди. Экология бошқармасидан рухсатнома олиб келганимдан кейин ҳам ижрони бажаришмади. Бюрога бораман-келаман, қўнғироқ қиламан, натижа йўқ. Ҳали буниси қариндош чиқади, ҳали униси таниш чиқади, ҳали буниси билан олди-бердиси бор. Хуллас, ижро бажарилмаяпти», — деди Давронов.
2020 йил апрелида Самарқанд шаҳар ҳокими ҳамда шаҳар прокурори бошчилигида тегишли ташкилотлар томонидан «Шаар-ташлама» ариғининг «Боғи Мирзо» ва «Қўшчинор» маҳалларидан оқиб ўтган қисмида ободонлаштириш, канал атрофида муҳофаза ҳудудини ташкил этиш ишлари амалга оширилган.
«Аммо биз ариқда ноқонуний қурилиш ишлари олиб борилганлиги бўйича барча тегишли ташкилотларнинг хулосалари, ҳатто суд қарорини олган бўлсак-да, икки йилдан буён ариқни тозалаш, ноқонуний қурилишни бузиш бўйича ҳеч қандай ишни амалга ошира олмаяпмиз. Вилоят ҳокимнинг Telegram’га мурожаат қилинганимиз ҳам, сайёр қабулида бўлганимиз ҳам фойда бермади», — дейди фуқаро.
Мавзуга доир: Кун фотоси: Самарқандда белигача сувга ботган ниқобли ходимлар бемор аёлни замбилда олиб кетяпти
Ҳамма бир овоздан: «Табиий ўзанни қайта тиклаш керак!»
Фуқаро Давронов 2018 йил июнидан бери ариқнинг ўзанини ўзгартириш бўйича турли ташкилотларга мурожаат қилади. Маълум бўлишича, Самарқанд шаҳар қурилиш бўлими ариқ ўзани ўзгаргани, унинг ҳудудида табиий офатларга олиб келиш эҳтимолини олдини олиш мақсадида 2018 йилнинг 30 июнь куни йўриқнома орқали Суҳроб Муҳаммадиевга умумий фойдаланишдаги ариқни ўз ҳолига қайтариш юзасидан огоҳлантириш берган.
Шунингдек, Самарқанд вилоят Фавқулодда вазиятлар бошқармаси 2018 йил 25 декабрда вилоят ҳокимига йўллаган хатида ҳам фуқаро Суҳроб Муҳаммадиев ариқнинг ўзанини уч метрга ўзгартирилгани маълум қилиниб, «Шаар-ташлама» ариғининг табиий ўзанини рухсатсиз ўзгартиргани учун уни ўз ўз ҳисобидан табиий ҳолатига қайтариши лозимлиги билдирилган.
Сув хўжалиги вазирлиги Зарафшон ирригация тизимлари ҳавза бошқармасининг 2018 йил 25 декабрдаги вилоят ҳокимигига йўллаган хатида ҳам «Сўзангарон» маҳалласидан ўтувчи «Шаар-ташлама» ариғида 2008—2010 йилларда фуқаро Суҳроб Муҳаммадиев томонидан 25 метр узунликда, 1,5 метр баландликда бетон қурилиш ишлари олиб борилиб, унинг ўзанига ўзгартириш киритилганлигини маълум қилинган.
2019 йил 12 апрель куни Самарқанд шаҳар ҳокимлиги ҳам «Шаар-ташлама»нинг табиий ўзани ўзгартирилганлиги, бу ҳолат офатларга олиб келиши мумкинлиги, ариқни табиий ўзанига қайтариш билан сув тошқинларининг олдини олиш мумкинлигини билдирган.
Самарқанд шаҳар Санитария-эпидемологик осойишталик марказининг фуқаролик ишлари бўйича Самарқанд шаҳар судига 2019 йил 24 декабрда йўллаган хатида фуқаро Суҳроб Муҳаммадиев ариқ ўзанини 3 метрга ўзгартиргани учун фуқаро Баҳром Давроновга тегишли уй-жой ва унинг яшаш хоналари деворларига зарар етгани, деворлар санитария қоида ва нормаларига жавоб бермаслигини билдирган.
Самарқанд шаҳар қурилиш бўлими томонидан 2019 йил 26 декабрь кунги фуқаролик ишлари бўйича Самарқанд шаҳар судига чиқарилган хатда таъкидланишича, «Шаар-ташлама» ички ариқ ҳисобланиб, «Сўзангарон», «Абдулла Қаҳҳор», «Шарқ», «Фидойилар» маҳаллаларидан оқиб ўтади ва унинг йўналишини мутасаддилар билан келишмаган ҳолда ўзгартириш мумкин эмас. Шаҳар қурилиш бўлимининг хатида қайд этилишича, фуқаро Суҳроб Муҳаммадиев ариқни ўз ҳолига қайтариш лозим.
Изоҳ (0)