O‘zbekiston Markaziy banki, Iqtisodiy taraqqiyot va kambag‘allikni qisqartirish vazirligi hamda Davlat aktivlarini boshqarish agentligi rahbariyatida o‘zgarishlar yuz berdi. Bu haqda hukumatdagi manbasiga tayanib, “Gazeta.uz” xabar berdi.
2019-yilning mart oyidan Markaziy bank raisining o‘rinbosari sifatida faoliyat yuritgan Saidqahhor Xolxo‘jayev iqtisodiy taraqqiyot va kambag‘allikni qisqartirish vazirining birinchi o‘rinbosari lavozimiga tayinlandi.
Saidqahhor Xolxo‘jayev 1981-yilda Toshkent viloyati Oqqo‘rg‘on tumanida tug‘ilgan. Toshkent moliya instituti bakalavr (2002-yil) va magistratura (2004-yil) bosqichlarini tugatgan. Bank sohasida 17 yil faoliyat yuritgan. 2017—2019-yillarda “O‘zagrosug‘urta” kompaniyasiga rahbarlik qilgan.
Vazirlar Mahkamasi huzuridagi Makroiqtisodiy tahlil, tarkibiy o‘zgartirishlar, moliya-bank tizimi, davlat aktivlarini boshqarish, raqobatni rivojlantirish, tadbirkorlikni qo‘llab-quvvatlash va kambag‘allikni qisqartirish kotibiyati rahbari Ayubxon Kamolov esa Markaziy bank raisining yangi o‘rinbosari etib tayinlandi.
Ayubxon Kamolov 1971-yilda Namangan shahrida tug‘ilgan. 1993-yilda Leningrad qishloq xo‘jaligi instituti, 2001-yilda Namangan muhandislik-pedagogika institutini tamomlagan. 1994—2017-yillarda bank va Moliya vazirligi tizimlarida turli vazifalarda ishlagan. Ayubxon Kamolov 2017—2019-yillar davomida Vazirlar Mahkamasi huzuridagi tadbirkorlik faoliyatini rivojlantirishni qo‘llab-quvvatlash davlat jamg‘armasi ijrochi direktori bo‘lgan. U 2019-yil fevralidan 2020-yilning may oyiga qadar Namangan viloyati hokimining birinchi o‘rinbosari vazifasida ishlagan.
2020-yilning 28-martidan beri iqtisodiy taraqqiyot va kambag‘allikni qisqartirish vazirining birinchi o‘rinbosari lavozimida ishlab kelgan Akmalxon Ortiqov Davlat aktivlarini boshqarish agentligi direktori etib tayinlandi.
Akmalxon Ortiqov avval Namangan viloyat hokimining birinchi o‘rinbosari lavozimida faoliyat yuritgan. U 1980-yilda tug‘ilgan, Toshkent davlat iqtisodiyot institutini tamomlagan. 2001-yildan 2013-yilgacha Moliya vazirligi tuzilmalarida turli lavozimlarda ishlagan. 2013—2015-yillarda Namangan viloyati, 2015—2017-yillarda Farg‘ona viloyati hokimiyati moliya boshqarmasiga rahbarlik qilgan.
Izoh (0)