Bugun,

  • USD 11095.31
  • RUB 173.84
  • EUR 10772.44

2020-yilning 17-dekabridan boshlab Tashkent City Park hududiga kirish pullik qilib qo‘yildi. Mazkur bog‘ hududini tomosha qilish uchun belgilangan narxlar ijtimoiy tarmoqlarda keskin bahs-munozaralarga sabab bo‘lmoqda. OAV vakillari ushbu holat yuzasidan Turizmni rivojlantirish davlat qo‘mitasi rahbari Aziz Abduhakimovning munosabatiga qiziqib, unga bir qancha savol bilan yuzlandi.

Eslatib o‘tamiz, 17-dekabrdan boshlab Tashkent City bog‘iga bayram arafasi va Yangi yil kunlarida kirish pullik etib belgilandi. Bayram chiptalari narxi 5 yoshgacha bo‘lgan bolalarga — bepul, 5 yoshdan 12 yoshgacha bo‘lgan bolalar uchun — 5 000 so‘m, 12 yoshdan kattalar uchun — 10 000 so‘m, pensionerlarga — 5 000 so‘m (guvohnoma mavjud bo‘lgan taqdirda), nogironligi bo‘lgan shaxslarga — bepul (guvohnoma mavjud bo‘lgan taqdirda), yengil avtomobilda kirish — 20 000 so‘m (yo‘lovchilarni hisobga olgan holda) etib belgilangan.

Aziz Abduhakimov

Aziz Abduhakimov
Foto: “Daryo”

“Tashkent City direksiyasi tijoriy tashkilot. Nima uchun pullik etib belgilanganligi to‘g‘risida uning egalaridan ham so‘rab ko‘rish kerak. Bu holatni hali o‘rganmasdan turib, xulosa berish qiyin. Qolaversa, Tashkent City direksiyasining haq-huquqlari bo‘yicha bu to‘g‘ri yoki noto‘g‘ri, deb qaror chiqarsak ham xato bo‘ladi. Balki, ularning kundalik, masalan, chiroyligi yoki hammani o‘ziga jalb qilib turishligini saqlab qolish maqsadida sarflanadigan qandaydir xarajatlari ko‘paygandir. Buning aniq sabablarini o‘rganish lozim. Boshqa bog‘larga borsangiz ham, ayniqsa, xususiy bog‘larning barchasi kirishni pullik qilib qo‘ygan”, dedi u.

Abduhakimov “Bu holatni ichki turizmga ta’siri to‘g‘risida nima deya olasiz?”, degan savolga quyidagicha javob berdi:

“Turizm shunday narsaki, dunyoning qayeriga borsangiz ham tarixiy obidalarni ko‘rish, ziyorat qilish yoki esdalik sovg‘alari sotib olish uchun baribir xarajat qilasiz. Tashkent City Park hududi juda ko‘p odamlarni o‘ziga jalb qiladi. Haqiqatan chet elga borishga imkoniyati yo‘q aholi, ayniqsa, viloyatlik ko‘plab hamyurtlarimiz shu yerga kelishadi. Bog‘ga kirishning pullik qilib qo‘yilgani bo‘yicha yuqorida aytganimdek, mutasaddilarning o‘zidan aniq izoh olish kerak”, — dedi bosh vazir o‘rinbosari.

Avvalroq Tashkent City xalqaro ishbilarmonlik direksiyasi rahbari Bahrom Rizayev bog‘ga kirish nima uchun pullik bo‘lganiga izoh bergan edi.

Ma’lumot uchun, 2019-yilning oktabr oyida Jahongir Ortiqxo‘jayev Tashkent City ochilishi munosabati bilan qilgan videomurojaatida “Bu — xalqimiz uchun. Bu joy — millatimiz uchun. Ilohim, millatimizga ushbu yaxshi joy buyursin! Xalqimiz kelib, yayrasin! Farzandlari bilan o‘ynab, kulsin! Hammasi xalqimiz, O‘zbekiston xalqi uchun va aziz, mehribon millatimiz uchun!», – degan edi.

Izoh
Asosiy yangiliklar
Mahalliy
Oʻzbekiston energetikasi: ortayotgan talab, taqchillik va koʻrilayotgan choralar haqida
Dunyo
Qirg‘izistonda 9 kishida “Seftriakson”ga allergik reaksiya kuzatildi, bir kishi vafot etdi
Mahalliy
Besh yilda 218 mingdan koʻproq xonadon. Oʻzbekistonda uy-joy muammosi qanday hal etilmoqda?