Qimmat ko‘chadagi uy, mashinalar va mo‘maygina daromad. “Liverpul” xaloskori Yurgen Klopp qanday hayot kechiradi?

Dortmundning “Borussiya” klubidagi bir qancha muvaffaqiyatli mavsumlardan so‘ng “Liverpul” boshqaruvini qabul qilib olgan Yurgen Klopp qisqa vaqt ichida Mersisayd klubining avvalgi mavqeyini tiklash bilan birga, jamoaga Chempionlar Ligasi va Angliya Premyer Ligasidagi g‘alabalarni ham taqdim etdi. Tabiiyki, bu uni mashhurlik cho‘qqisiga olib chiqdi, ko‘plab futbol ishqibozlari esa uning personal muxlisiga aylandi. Quyida Kloppning muxlislari uchun murabbiyning qanday hayot kechirishi haqida ma’lumot berib o‘tamiz.

Qayerda yashaydi?

Klopp Angliyaga ko‘chib o‘tganidan keyin (2015-yilda) Liverpuldagi mehmonxonalarning biriga joylashadi. Ammo biroz vaqt o‘tgach, murabbiy Liverpuldan 20 kilometr uzoqlikda joylashgan Irlandiya dengizi sohilidagi Formbi shaharchasidan o‘ziga yangi uy topishga muvaffaq bo‘ladi.

Kloppning uyi joylashgan hudud Mersisaydning eng qimmat ko‘chasi hisoblanadi. Uyning narxi, taxminan, 2 million yevroni tashkil qiladi.

Klopp ushbu uyni sotib olmagan. Ma’lumotlarga ko‘ra, hashamatli uy yoki “Liverpul”ga tegishli, yoki ijara haqini klub to‘lab beradi.

Mashinalari

Kloppning “Liverpul”dagi daromadi (bu haqida keyinroq) hisobga olib, uning avtoparkini hashamatli deb atash mushkul: Yurgenning birinchi avtomobili 22 ming dollarlik qora rangdagi Opel Insignia bo‘lsa, ikkinchisi oq rangdagi Opel Insignia (narxi ham shunday).

Gap shundaki, germaniyalik mutaxassis nemis kompaniyasining Buyuk Britaniyadagi elchisi hisoblanadi, shuning uchun unga boshqa mashinalarni boshqarish yoki xarid qilish taqiqlangan. Yuqoridagi mashinalar esa unga tekinga tushgan.

Shaxsiy hayoti

Klopp ikkinchi yarmi bilan hayot yo‘llarini uzoq 2005-yilda bog‘lagan. O‘sha vaqtlarda ma’lumoti bo‘yicha o‘qituvchi bo‘lgan Ulla (Kloppning rafiqasi) ofitsiant sifatida faoliyat yuritardi va futbolni umuman tushunmasdi. Klopp bilan tanishish esa uning hayotini butunlay o‘zgartirib yubordi, Ulla nafaqat futbolga mehr qo‘ydi, balki bolalar uchun ushbu sport turi  haqida kitob ham yozdi. Ulla tez-tez “Liverpul” o‘yinlariga tashrif buyurib turadi.

Kloppning birinchi turmushidan Mark ismli o‘g‘li bor. U ma’lum vaqt davomida “Borussiya D”ning asosiy jamoasida ham o‘ynagan, biroq jarohati sabab faoliyatini erta yakunlashga majbur bo‘lgan.

Futboldan tashqari qiziqishlar

Klopp oilaparvar inson bo‘lib, asosiy vaqtini rafiqasi va iti bilan birga o‘tkazadi. Dam olish kunlari esa Yurgen odatda iti bilan sayrga chiqadi, u og‘ir o‘yinlardan keyin asablarini shu tarzda tinchlantiradi.

Bundan tashqari “Liverpul” ustozini ko‘pincha mahalliy The Freshfield pabidan ham topish mumkin. Shinamgina pab Yurgenning uyidan bor-yo‘g‘i 3 daqiqalik masofada joylashgan va Britaniyaning eng yaxshi pablaridan biri sifatida tan olingan.

Daromadi

Yuqorida ta’kidlanganidek, Yurgen 2015-yildan “Liverpul”ni boshqarib kelmoqda, uning mersisaydliklar bilan shartnomasi 2022-yilning iyuniga qadar amal qiladi. Klubdagi maoshi esa bonuslar birgalikda yiliga, taxminan, 16 million yevroni tashkil qiladi. Ammo Kloppning ko‘plab taniqli shaxslar singari, boshqa daromad manbalari ham bor.

Aytishlaricha, Puma, Opel va yana bir nechta kompaniyalar bilan imzolangan reklama shartnomalari mutaxassisga yiliga yana 15 million yevroni taqdim etadi. Shu tariqa Yurgenning yillik daromadi 31 million yevroga yetadi. Klopning deyarli katta xaridlarni amalga oshirmasligi hisobga olinib aytilsa, u faoliyatining oxiriga borib yaxshigina pul g‘amlab qo‘yishi aniq.