Professional boksning super o‘rta vazn (-76,2 kg) toifasida ringga chiqayotgan Bektemir Meliqo‘ziyev (6-0, 5 KO) o‘zining navbatdagi jangini 2021-yil 30-yanvarida o‘tkazadigan bo‘ldi.
Bektemir Moskvadagi “Lujniki” stadionida tashkil etiladigan boks oqshomining asosiy jangida ringga chiqadi. O‘zbekistonlik bokschiga rossiyalik Sergey Kovalyov (34-4-1, 29 КО) raqiblik qiladi. Ushbu ma’lumotni rossiyalik bokschining o‘zi ham tasdiqladi.
Jang tomonlarning kelishuviga ko‘ra 80,7 kg vaznda o‘tkaziladi. To‘qnashuv DAZN platformasi tomonidan onlayn translyatsiya qilinadi.
Ma’lumot uchun, Sergey Kovalyov yarim og‘ir vazn toifasida WBA Super, IBF va WBO chempionlik kamarlarining sobiq sohibi hisoblanadi. U professional boksda hozirga qadar 34 ta jangda g‘alaba qozongan, shundan 29 tasida raqiblarini nokautga uchratgan. 4 ta jangda mag‘lub bo‘lgan, 1 ta jangi esa durang bilan yakunlangan.
Kovalyov o‘zining so‘nggi jangini 2019-yil 2-noyabrida meksikalik Saul “Kanelo” Alvaresga qarshi o‘tkazib, 11-raundda nokautga uchrab mag‘lub bo‘lgan.
Bektemir Meliqo‘ziyev hozirgacha professional boksda 6 ta jang o‘tkazib, ularning barchasida g‘alaba qozongan, 5 ta jangda raqiblarini nokautga uchratgan.
Bektemir so‘nggi jangini 2020-yil 30-oktabrida meksikalik Alan Kampaga (17-6, 11 KО) qarshi o‘tkazib, 3-raunddagi nokaut evaziga g‘alaba qozongandi.
Izoh (0)