Қиммат кўчадаги уй, машиналар ва мўмайгина даромад. «Ливерпуль» халоскори Юрген Клопп қандай ҳаёт кечиради?

Дортмунднинг «Боруссия» клубидаги бир қанча муваффақиятли мавсумлардан сўнг «Ливерпуль» бошқарувини қабул қилиб олган Юрген Клопп қисқа вақт ичида Мерсисайд клубининг аввалги мавқейини тиклаш билан бирга, жамоага Чемпионлар Лигаси ва Англия Премьер Лигасидаги ғалабаларни ҳам тақдим этди. Табиийки, бу уни машҳурлик чўққисига олиб чиқди, кўплаб футбол ишқибозлари эса унинг персонал мухлисига айланди. Қуйида Клоппнинг мухлислари учун мураббийнинг қандай ҳаёт кечириши ҳақида маълумот бериб ўтамиз.

Қаерда яшайди?

Клопп Англияга кўчиб ўтганидан кейин (2015 йилда) Ливерпулдаги меҳмонхоналарнинг бирига жойлашади. Аммо бироз вақт ўтгач, мураббий Ливерпулдан 20 километр узоқликда жойлашган Ирландия денгизи соҳилидаги Формби шаҳарчасидан ўзига янги уй топишга муваффақ бўлади.

Клоппнинг уйи жойлашган ҳудуд Мерсисайднинг энг қиммат кўчаси ҳисобланади. Уйнинг нархи, тахминан, 2 миллион еврони ташкил қилади.

Клопп ушбу уйни сотиб олмаган. Маълумотларга кўра, ҳашаматли уй ёки «Ливерпуль»га тегишли, ёки ижара ҳақини клуб тўлаб беради.

Машиналари

Клоппнинг «Ливерпуль»даги даромади (бу ҳақида кейинроқ) ҳисобга олиб, унинг автопаркини ҳашаматли деб аташ мушкул: Юргеннинг биринчи автомобили 22 минг долларлик қора рангдаги Opel Insignia бўлса, иккинчиси оқ рангдаги Opel Insignia (нархи ҳам шундай).

Гап шундаки, германиялик мутахассис немис компаниясининг Буюк Британиядаги элчиси ҳисобланади, шунинг учун унга бошқа машиналарни бошқариш ёки харид қилиш тақиқланган. Юқоридаги машиналар эса унга текинга тушган.

Шахсий ҳаёти

Клопп иккинчи ярми билан ҳаёт йўлларини узоқ 2005 йилда боғлаган. Ўша вақтларда маълумоти бўйича ўқитувчи бўлган Улла (Клоппнинг рафиқаси) официант сифатида фаолият юритарди ва футболни умуман тушунмасди. Клопп билан танишиш эса унинг ҳаётини бутунлай ўзгартириб юборди, Улла нафақат футболга меҳр қўйди, балки болалар учун ушбу спорт тури  ҳақида китоб ҳам ёзди. Улла тез-тез «Ливерпуль» ўйинларига ташриф буюриб туради.

Клоппнинг биринчи турмушидан Марк исмли ўғли бор. У маълум вақт давомида «Боруссия Д»нинг асосий жамоасида ҳам ўйнаган, бироқ жароҳати сабаб фаолиятини эрта якунлашга мажбур бўлган.

Футболдан ташқари қизиқишлар

Клопп оилапарвар инсон бўлиб, асосий вақтини рафиқаси ва ити билан бирга ўтказади. Дам олиш кунлари эса Юрген одатда ити билан сайрга чиқади, у оғир ўйинлардан кейин асабларини шу тарзда тинчлантиради.

Бундан ташқари «Ливерпуль» устозини кўпинча маҳаллий The Freshfield пабидан ҳам топиш мумкин. Шинамгина паб Юргеннинг уйидан бор-йўғи 3 дақиқалик масофада жойлашган ва Британиянинг энг яхши пабларидан бири сифатида тан олинган.

Даромади

Юқорида таъкидланганидек, Юрген 2015 йилдан «Ливерпуль»ни бошқариб келмоқда, унинг мерсисайдликлар билан шартномаси 2022 йилнинг июнига қадар амал қилади. Клубдаги маоши эса бонуслар биргаликда йилига, тахминан, 16 миллион еврони ташкил қилади. Аммо Клоппнинг кўплаб таниқли шахслар сингари, бошқа даромад манбалари ҳам бор.

Айтишларича, Puma, Opel ва яна бир нечта компаниялар билан имзоланган реклама шартномалари мутахассисга йилига яна 15 миллион еврони тақдим этади. Шу тариқа Юргеннинг йиллик даромади 31 миллион еврога етади. Клопнинг деярли катта харидларни амалга оширмаслиги ҳисобга олиниб айтилса, у фаолиятининг охирига бориб яхшигина пул ғамлаб қўйиши аниқ.