O‘zbekiston Kioto konvensiyasining 3-bobidagi kabotaj tashuvlaridan tashqari barcha qismlariga qo‘shiladi. Bu haqda 15-dekabr, seshanba kuni Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri.
Anjumanda “Bojxona tartib-taomillarini soddalashtirish va uyg‘unlashtirish to‘g‘risidagi xalqaro konvensiyaga O‘zbekiston Respublikasining qo‘shilishi to‘g‘risida”gi qonuni muhokama qilindi. Ushbu hujjat 18-dekabr kuni Oliy Majlis Senatining o‘ninchi yalpi majlisida ko‘rib chiqish uchun rejalashtirilgan.
Davlat bojxona qo‘mitasi raisi o‘rinbosari Baxtiyor Rahimovning aytishicha, konvensiyaning asosiy maqsadi bojxona tartibotlarini soddalashtirish va uyg‘unlashtirish orqali tashqi savdo subyektlariga qulay shart-sharoitlar yaratish hisoblanadi.
“Mamlakatimizning ushbu konvensiyaga qo‘shilishining maqsadga muvofiqligi 2018-yildan buyon o‘rganilmoqda. O‘zbekiston shu paytga qadar ushbu xalqaro konvensiyani ratifikatsiya qilmaganining qator sabablari mavjud. Birinchidan, milliy bojxona qonunchiligi me’yorlari bojxona kodeksi hamda bojxona ma’murchiligini takomillashtirishga qaratilgan bir qancha normativ-huquqiy hujjatlar qabul qilingunga qadar konvensiya qoidalariga muvofiq bo‘lmagan. Hozir amaldagi bojxona kodeksimiz esa konvensiyaning asosiy qismini qamrab olgan. Ikkinchidan, konvensiyaning ayrim qoidalarini amaliyotga joriy etish muayyan vaqt va iqtisodiy resurslarni talab qilgan. Ta’kidlash kerakki, biz konvensiyaning 3-bobidagi kabotaj tashuvlaridan tashqari barcha qismlariga qo‘shilmoqdamiz. Kabotajga qo‘shilmasligimizga sabab — ichki avtotashuvchilarimizni himoya qilish”, — dedi Baxtiyor Rahimov.
Bojxona qo‘mita raisi o‘rinbosarining qo‘shimcha qilishicha, konvensiyaga O‘zbekistoning qo‘shilishi natijasida iqtisodiyotga xorijiy investitsiyalarni keng jalb qilish uchun yetarli sharoitlar yaratiladi.
“Konvensiya qoidalarini amaliyotga to‘liq joriy etish uchun ma’lum muddat talab qilinishi tufayli yaqin uch yillikda milliy bojxona qonunchiligining takomillashtirish strategiyasi belgilanadi. Davlatimizni Jahon savdo tashkilotiga qo‘shilishiga ijobiy ta’sir ko‘rsatadi”, — dedi u.
Ma’lumot uchun, Kioto konvensiyasi 1973-yil 18-mayda Kioto shahrida qabul qilingan bo‘lib, unga 1999-yil 26-iyunda o‘zgartirishlar kiritilgan. 2006-yil 3-fevralda yangi tahrirda kuchga kirgan. Bugungi kunda Xalqaro bojxona tashkilotiga a’zo 183 ta davlatdan 121 tasi, shuningdek, 7 ta MDHga a’zo davlat (Ozarbayjon, Armaniston, Belarus, Qozog‘iston, Rossiya, Tojikiston va Ukraina) mazkur konvensiyaga qo‘shilgan.
Avvalroq Davlat bojxoba qo‘mitasi Rossiya tomonidan O‘zbekistonning ayrim qishloq xo‘jaligi mahsulotlariga taqiq qo‘yilayotganiga munosabat bildirgan edi.
Izoh (0)