Ўзбекистон Киото конвенциясининг 3-бобидаги каботаж ташувларидан ташқари барча қисмларига қўшилади. Бу ҳақда 15 декабрь, сешанба куни Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси томонидан ўтказилган матбуот анжуманида маълум қилинди, дея хабар бермоқда «Дарё» мухбири.
Анжуманда «Божхона тартиб-таомилларини соддалаштириш ва уйғунлаштириш тўғрисидаги халқаро конвенцияга Ўзбекистон Республикасининг қўшилиши тўғрисида»ги қонуни муҳокама қилинди. Ушбу ҳужжат 18 декабрь куни Олий Мажлис Сенатининг ўнинчи ялпи мажлисида кўриб чиқиш учун режалаштирилган.
Давлат божхона қўмитаси раиси ўринбосари Бахтиёр Раҳимовнинг айтишича, конвенциянинг асосий мақсади божхона тартиботларини соддалаштириш ва уйғунлаштириш орқали ташқи савдо субъектларига қулай шарт-шароитлар яратиш ҳисобланади.
«Мамлакатимизнинг ушбу конвенцияга қўшилишининг мақсадга мувофиқлиги 2018 йилдан буён ўрганилмоқда. Ўзбекистон шу пайтга қадар ушбу халқаро конвенцияни ратификация қилмаганининг қатор сабаблари мавжуд. Биринчидан, миллий божхона қонунчилиги меъёрлари божхона кодекси ҳамда божхона маъмурчилигини такомиллаштиришга қаратилган бир қанча норматив-ҳуқуқий ҳужжатлар қабул қилингунга қадар конвенция қоидаларига мувофиқ бўлмаган. Ҳозир амалдаги божхона кодексимиз эса конвенциянинг асосий қисмини қамраб олган. Иккинчидан, конвенциянинг айрим қоидаларини амалиётга жорий этиш муайян вақт ва иқтисодий ресурсларни талаб қилган. Таъкидлаш керакки, биз конвенциянинг 3-бобидаги каботаж ташувларидан ташқари барча қисмларига қўшилмоқдамиз. Каботажга қўшилмаслигимизга сабаб — ички автоташувчиларимизни ҳимоя қилиш», — деди Бахтиёр Раҳимов.
Божхона қўмита раиси ўринбосарининг қўшимча қилишича, конвенцияга Ўзбекистонинг қўшилиши натижасида иқтисодиётга хорижий инвестицияларни кенг жалб қилиш учун етарли шароитлар яратилади.
«Конвенция қоидаларини амалиётга тўлиқ жорий этиш учун маълум муддат талаб қилиниши туфайли яқин уч йилликда миллий божхона қонунчилигининг такомиллаштириш стратегияси белгиланади. Давлатимизни Жаҳон савдо ташкилотига қўшилишига ижобий таъсир кўрсатади», — деди у.
Маълумот учун, Киото конвенцияси 1973 йил 18 майда Киото шаҳрида қабул қилинган бўлиб, унга 1999 йил 26 июнда ўзгартиришлар киритилган. 2006 йил 3 февралда янги таҳрирда кучга кирган. Бугунги кунда Халқаро божхона ташкилотига аъзо 183 та давлатдан 121 таси, шунингдек, 7 та МДҲга аъзо давлат (Озарбайжон, Арманистон, Беларусь, Қозоғистон, Россия, Тожикистон ва Украина) мазкур конвенцияга қўшилган.
Аввалроқ Давлат божхоба қўмитаси Россия томонидан Ўзбекистоннинг айрим қишлоқ хўжалиги маҳсулотларига тақиқ қўйилаётганига муносабат билдирган эди.
Изоҳ (0)