Osiyo taraqqiyot banki O‘zbekiston aholisi bandligini ta’minlashga 93 mln dollar ajratadi

Osiyo taraqqiyot banki (OTB) O‘zbekistonda raqobatbardoshlilikni oshirish va inklyuziv o‘sishni rag‘batlantirishga qaratilgan loyiha uchun 93 million dollar kredit ajratishni ma’qulladi. Bu haqda bank matbuot xizmati ma’lum qildi, deb xabar bermoqda “Gazeta.uz”.

“O‘zbekiston Respublikasida zamonaviy iqtisodiyot uchun ko‘nikmalarni rivojlantirish” loyihasi besh sohada: qurilish, to‘qimachilik va tikuvchilik, AKT, agrobiznes va oziq-ovqat sanoati, texnikalarni ta’mirlash va texnik xizmat ko‘rsatish sohalarida malakali kadrlarni tayyorlashga qaratilgan.

Loyihada kamida 60 ming fuqaro, shu jumladan, 48 ming ishsiz yoki ish izlayotgan kishilar va 500 nafar imkoniyati cheklangan shaxslar o‘z kasbiy ko‘nikmalarini yaxshilash imkoniyatiga ega bo‘ladi. Ular o‘quv dasturlarini ishlab chiqishdan tortib ish joyida o‘qish va ishga joylashish bilan qamrab olinadi.

Bundan tashqari, loyiha malakali ishchilarni qidirishga, kadrlarni qayta tayyorlash yoki malakasini tasdiqlashga, qolaversa, muhojirlar qaytib kelgan sohalarga yordam beradi.

Eslatib o‘tamiz, Prezidentning martdagi farmoni bilan mazkur loyiha 2020-yil 1-iyulga qadar amalga oshirilishi va OTBdan 100 million dollar jalb etilishi belgilangan edi.

Moliya vazirligi e’lon qilgan 2020-yilning III choragida O‘zbekistonning davlat qarzi holati va dinamikasi sharhiga ko‘ra, O‘zbekiston davlat tashqi qarzining eng katta qismi Osiyo taraqqiyot banki hissasiga to‘g‘ri keladi.

Shu yilning aprel oyida O‘zbekiston koronavirus pandemiyasiga qarshi kurash hamda budjetni qo‘llab-quvvatlash maqsadida Osiyo taraqqiyot bankidan 1 milliard dollar miqdorida mablag‘ ajratishni so‘ragandi. Iyun oxirida OTB O‘zbekistonga COVID-19 pandemiyasi davrida iqtisodiyotni qo‘llab-quvvatlash uchun 500 million dollar miqdorida kredit berishni ma’qullagan. Iyul oyida sanitariya-epidemiologiya tizimini modernizatsiya qilishga 200 million dollar mablag‘, avgust oyida sog‘liqni saqlash tizimini rivojlantirish uchun 100 million dollar ajratgandi. Noyabr oyining o‘rtalarida OTB Farg‘ona vodiysidagi temiryo‘l tarmog‘ini modernizatsiya qilishni yakunlash uchun 121 million dollar miqdorida kreditni ma’qulladi.