Осиё тараққиёт банки (ОТБ) Ўзбекистонда рақобатбардошлиликни ошириш ва инклюзив ўсишни рағбатлантиришга қаратилган лойиҳа учун 93 миллион доллар кредит ажратишни маъқуллади. Бу ҳақда банк матбуот хизмати маълум қилди, деб хабар бермоқда «Gazeta.uz».
«Ўзбекистон Республикасида замонавий иқтисодиёт учун кўникмаларни ривожлантириш» лойиҳаси беш соҳада: қурилиш, тўқимачилик ва тикувчилик, АКТ, агробизнес ва озиқ-овқат саноати, техникаларни таъмирлаш ва техник хизмат кўрсатиш соҳаларида малакали кадрларни тайёрлашга қаратилган.
Лойиҳада камида 60 минг фуқаро, шу жумладан, 48 минг ишсиз ёки иш излаётган кишилар ва 500 нафар имконияти чекланган шахслар ўз касбий кўникмаларини яхшилаш имкониятига эга бўлади. Улар ўқув дастурларини ишлаб чиқишдан тортиб иш жойида ўқиш ва ишга жойлашиш билан қамраб олинади.
Бундан ташқари, лойиҳа малакали ишчиларни қидиришга, кадрларни қайта тайёрлаш ёки малакасини тасдиқлашга, қолаверса, муҳожирлар қайтиб келган соҳаларга ёрдам беради.
Эслатиб ўтамиз, Президентнинг мартдаги фармони билан мазкур лойиҳа 2020 йил 1 июлга қадар амалга оширилиши ва ОТБдан 100 миллион доллар жалб этилиши белгиланган эди.
Молия вазирлиги эълон қилган 2020 йилнинг III чорагида Ўзбекистоннинг давлат қарзи ҳолати ва динамикаси шарҳига кўра, Ўзбекистон давлат ташқи қарзининг энг катта қисми Осиё тараққиёт банки ҳиссасига тўғри келади.
Шу йилнинг апрель ойида Ўзбекистон коронавирус пандемиясига қарши кураш ҳамда бюджетни қўллаб-қувватлаш мақсадида Осиё тараққиёт банкидан 1 миллиард доллар миқдорида маблағ ажратишни сўраганди. Июнь охирида ОТБ Ўзбекистонга COVID-19 пандемияси даврида иқтисодиётни қўллаб-қувватлаш учун 500 миллион доллар миқдорида кредит беришни маъқуллаган. Июль ойида санитария-эпидемиология тизимини модернизация қилишга 200 миллион доллар маблағ, август ойида соғлиқни сақлаш тизимини ривожлантириш учун 100 миллион доллар ажратганди. Ноябрь ойининг ўрталарида ОТБ Фарғона водийсидаги темир йўл тармоғини модернизация қилишни якунлаш учун 121 миллион доллар миқдорида кредитни маъқуллади.
Изоҳ (0)