O‘zbekistonda tadbirkorlardan kelasi oy yoki chorak uchun oldindan soliq undirish amaliyoti mavjud. Bu haqda joriy yil 27-iyun kuni Toshkent shahrida o‘tkazilgan tadbirkorlar bilan muloqotda Soliq qo‘mitasi raisi Sherzod Kudbiyev maʼlum qildi.
Sherzod Kudbiyev respublikada soliq tushumlari oshayotgani, shunga qaramay baʼzi soliqchilar oldindan pul undirishga urinayotganini qoraladi.
“Soliq tushumlarida shu yilning olti oyida o‘tgan yil mos davriga nisbatan kamida 25 foiz o‘sish bo‘ladi. Haligacha ayrim soliq organlarida tadbirkorga qo‘ng‘iroq qilib, ‘5, 10, 20 million so‘m o‘tkazib tur, keyingi oy hisobidan hozir avans berib tur’, degan masalalar turibdi. O‘zimning xodimlarimga: ‘hoy baraka topgurlar, soliq tushumi o‘zi 25 foiz o‘syapti, mayli bu 24 foiz bo‘laqolsin. Bizni 30–40 foiz qilasan degan topshirig‘imiz yo‘q-ku’, deyman”, dedi qo‘mita rais.
Sherzod Kudbiyev so‘zi davomida hali topilmagan daromad uchun oldindan soliq to‘lash tadbirkorni xafa qilishini aytdi.
“Kichik biznesdan 10 milliard so‘m pul tushirish uchun 10 million so‘mdan mingta tadbirkordan olish kerak. ‘Bu yerda mingta tadbirkorni qanchalik xafa qilib tashlaymiz? Pulini oldindan olib qo‘ygan bo‘lamiz. Shu ishning nima keragi bor’, deyman. Albatta, kamchilik va xatolarimiz bor. Sekin-asta to‘g‘rilab boramiz. Shu kabi achchiq masalalar bo‘lsa ham aytsanglar, to‘g‘rilashga harakat qilamiz. Shunda dardlaringizni tushunishni boshlaymiz, ochiqchasiga gaplashishga chaqirib qolamiz”, deya tadbirkorlarga murojaat qildi tashkilot rasmiysi.
“Daryo” avvalroq oldindan soliq undirish amaliyotining xatarlari to‘g‘risida maqola eʼlon qilgandi. Tahlilda tadbirkor soliqchilar bosimidan qo‘rqib, aylanma mablag‘idan ortiqcha soliq to‘lashga majbur bo‘lishi yozilgan. Bunday norasmiy va noqonuniy xatti-harakat ortidan iqtisodiy vaziyatni real baholash imkonsiz holga kelishi qayd etilgan. Shuningdek, biznes, ishlab chiqarish va raqobat darz ketishi mumkinligi taʼkidlangan. Eng yomoni, aylanma mablag‘laridan hali olmagan foydasi uchun soliq to‘lagan tadbirkorda qiyin moliyaviy ahvolga tushib qolish ehtimoli borligi tahlil qilingan.
Soliq kodeksida yozilishicha: “ortiqcha undirilgan soliq summasi — soliq organlarining g‘ayriqonuniy xatti-harakatlari natijasida ortiqcha to‘langan soliq summasi” hisoblanadi.
Izoh (0)