“Hozircha faoliyatimdan qoniqish hosil qilmayapman” — Muborak tumani hokimi hokimlik mashaqqatlari haqida

Qashqadaryo viloyatining Muborak tumani hokimi Ulug‘bek Ernazarov Xalq deputatlari tuman kengashining navbatdagi sessiyasidan so‘ng juranlist va blogerlar bilan suhbatlashib, hokimlik faoliyatidagi mashaqqatlar haqida gapirdi, deya xabar berdi “Daryo” muxbiri.

Hokim Ulug‘bek Ernazarov “Daryo” muxbirining “Olti oylik faoliyatingiz davomida rejalashtirilgan ishlaringizning qay biriga ulgurdingiz-u, qay biriga ulgurmadingiz va 2021-yilga qoldi?”, degan savoliga javob berar ekan, barcha narsa ham hokimlarga bog‘liq emasligini ta’kidladi.

“Hokim bo‘lgunimcha tumanni juda tez rivojlantirib, katta o‘zgarishlar qilishni, fuqarolarning hayotida juda katta o‘zgarishlarni amalga oshirib, shu yurtda ijobiy nomim qolishini orzu qilganman. Ammo hamma narsa ham biz o‘ylagandek bo‘lavermaydi. Hozir qancha ko‘p ishlayotgan bo‘lsak ham, ishning oxiriga yetib bo‘lmayapti. Sababi ko‘p narsa hokimlarga bog‘liq emas ekan. Ayrim ishlar ko‘p vaqt talab qiladi. Ayrim tashkilotlar esa yurtboshimiz talab qilayotgan ishlarni bajarishga, ular aytgan darajaga yetib olishga salohiyati yetmayapti. Bu esa hokim faoliyatiga katta ta’sir qiladi. Shu bois, hozircha faoliyatimdan qoniqish hosil qilmayapman. Men o‘ylagan natija bo‘lmayapti. Lekin harakatdan to‘xtash yo‘q”, — dedi Ulug‘bek Ernazarov.

Hokim hisob-kitobiga ko‘ra, u faoliyati davomida amalga oshirishi kerak bo‘lgan ishlarning 7—8 foizini bajarishga ulgurgan.

“Tumanda muammolarimiz ham, xalq talabi ham ko‘p. Xalqimiz bir necha yillardan beri amalga oshmayotgan orzu-umidlari juda tez, bugun amalga oshishini talab qilyapti. Shuning uchun ham men o‘zim olti oylik faoliyatimdan qoniqish hosil qilmayapman. Rejalashtirilgan ishlarimga ulgurmayapman. Ammo endi tajribam ortmoqda, ko‘ryapmiz va yoningizda kimlar bo‘lishi kerakligini bilyapmiz. Boisi, ko‘p narsa hokim yonidagi jamoaga bog‘liq. Hokim jamoasi kuchli bo‘lsa, xodimlar tuman yukini hokim bilan baravar tortsa, yuk yengil bo‘ladi. Hozir yuk og‘ir. Jamoamiz yangilanyapti, yosharyapti. Shuning uchun 2021-yilda natijamiz bundan ham yaxshi bo‘ladi”, — dedi tuman hokimi.

Eslatib o‘tamiz, 2019-yildan buyon Qashqadaryo viloyati Transport boshqarmasi boshlig‘i vazifasida ishlagan Ulug‘bek Ernazarov 2020-yil 19-may kuni Muborak tumaniga hokim etib tayinlangan edi.